بالمقارنة بكلابه.. رسالة قاسية من خالد الصاوي لبعض الشخصيات في الوسط الفني (فيديو)
![](https://almogaz.com/sites/all/themes/almogaz/images/sms.jpg)
![](https://almogaz.com/sites/default/files/styles/almgoaz_img/public/feed_images/24/08/18/00000.jpg?itok=y7OjwDEd)
الموجز
وجه الفنان خالد الصاوي رسالة غامضة لبعض الشخصيات بالوسط الفني، مع نشره فيديو عبر حسابه الخاص بمنصة "إنستجرام" وهو يلعب وبحتضن كلابه.
وكتب الصاوي تعليقا على الفيديو قائلا: "دول أعرفهم من كام سنة بس وبيرحبوا بيا كده ومش عايزين مصلحة، بينما الناس دكها ودكهم ودول عشرة عشرين وثلاثين سنة وأتصل لعرض مشروع أو طلب صغير بعشم السنين ميردوش أو يردوا ويقولوا بكرة نخلصها ويدوبوا، وفجأة أصحى بعد شهرين على حد منهم اتصل عشر مرات وكلم مكتبي وبيتي بل وبيت أمي وياخدني بالصوت ويعتب عليا عشان مش بسأل".
وأضاف الفنان: "كلابي بتاكل معايا ودول بيحاولوا دايمًا يأكلوا آخر دفعة مني، كلابي بتعملي هيصة لو سمعت صوتي جاي من التليفون أو أخش الكمباوند، بس دول بيغيروا أرقامهم لما تخلص حاجتي من ستي وما يفكروش يبعتولي الجديدة، كلابي بتكتئب وتنام جنبي وتمسح دمعي وأنا نايم لما بكون حزين أو عيان أو مشقوط بين إنتاج مش بيدفع وضرايب ما بترحمش، أما دول فرغم العشرة والأحضان والتلزيق لكن في ظهري بياخدوا صف خصومي وهم عارفين أن خطيئتي الكبرى بالنسبة لهم ولأسيادهم إن دمي حر لا أقبل إهانة من أي حد مهما كان حجمه".
وتابع: "كلابي زيي بتشتبك مع أي كلب يفكر يبلطج وساعات اخش معاهم وأدي المغرور صاحب العدو نصيبه، وأروح البيت مع كلابي وعيالي آخر هيبرة، رغم الكدمات والخدوش واثقين في إخلاصنا لبعض وعزة نفسنا، مستعدين للي بعده، وتمر لحظة شجن يعدي طيف ميكي حبيب قلبي اللي كان الأقل حجمًا بس الأشرس، وهو الذكر القائد على أربعة من فصيلته وثلاثة بلدي".
واختتم الفنان خالد الصاوي: "الآن أرتاح لصداقة اللي عندهم نخوة من أي من مخلوقات الله، ولم أعد أطيق من ولدوا أحرارًا فزحفوا بحريتهم الأخيرة صوب معبد الذهب وعبودية الأنانية والندالة وعبادة الفلاتر والمؤثرات ومكياج الترند".
يشار إلى أن خالد الصاوي خاض السباق الرمضاني 2024 بمشاركته في مسلسل صدفة بطولة: ريهام حجاج، عصام السقا.