كلنا اطلقنا والدنيا مشيت وأنا اتجوزت أكتر من مرة .. ميار الببلاوي توجه رسالة نارية لشيرين عبد الوهاب

الموجز

وجهت الفنانة ميار الببلاوي رسالة للفنانة شيرين عبد الوهاب، بعد ظهورها بوزن زائد أثناء تكريمها في جامعة مصر للعلوم والتكنولوجيا، منذ أيام.

ونشرت ميار مقطع فيديو، عبر حسابها الخاص بموقع "فيسبوك"، قالت فيه :"أنا بصراحة شوفت الفنانة الكبيرة شيرين عبد الوهاب وهي بتتكرم من مهرجان ما، وشوفت الفستان اللي هي لابساه، شوفت الوزن اللي هي وصلت ليه، وشوفت شعرها، أنا مش عارفه في ايه، شيرين فوقي لنفسك، ولأولادك، الدنيا ما بتقفش على أي راجل في العالم".

وأضافت، :"اسأليني أنا كلنا أتصدمنا، كلنا اطلقنا، كلنا فشلنا، وكلنا كان عندنا مسؤولية، كلنا حبينا، وكلنا اتسابنا، لكن يا حبيبتي، أنتي مش ملك نفسك، أنتي ملك جمهورك، بالفن اللي بتقدميه، وقبل جمهورك أنتي مثل أعلى لبناتك، أنتي عايزة تبعتيلي رسالة إنك إدمرتي، ما ينفعش تبعتيله رسالة إنك زهدتي في الدنيا".

وتابعت، :"أنا بحبك قوي، وكان عندي ولد وأتعرضت لنفس الموقف دا، اتطلقت وكنت لوحدي وكنت متعلقة جدا بالشخص اللي اتطلقت منه، لكن بعدها الدنيا مشيت واتجوزت أكتر من مرة، عارفة إن حبك كان جامد أوي والعلاقة كانت حلوة، حبيبتي قومي وأقفي واثبتي وجودك، البسي أحلى حاجة، وارجعي ظبطي وزنك، أنا أتخضيت لما شوفتك طالعة بالطريقة دي، شيرين أرجوكي بناتك كدا هيتعقدوا، يا أما لما يعرفوا واحد هيبقوا عبيد تحت رجليه، يا إما مش هيدخلوا في أي علاقة".

وأكملت، :"احنا مستنينك، شيرين اللي بنحبها، شيرين اللي بتفرز فن، الجدعة، المصرية الاصيلة، اللي بتاخد الخبطة وتقف تاني بميت راجل، أنا ما عرفش ليه بقولك كدا، يمكن أنا حاسة بوجعك أوي، لأنه عدى عليا أكتر من مرة، لكن الدنيا ما بتقفش على حد، وبصتك في بناتك بالدنيا".

وكانت الفنانة شيرين عبدالوهاب وجهت رسالة إلى الجمهور التونسي قبل ساعات من إحيائها حفل ختام مهرجان «قرطاج» الدولي المقرر إقامته الليلة بتونس.

ونشرت شيرين صورة عبر حسابها الشخصي على موقع التواصل الاجتماعي، إنستجرام ظهرت خلالها بصحبة الفنان التونسي صابر الرباعي وزوجته، والسفير المصري بتونس وزوجته، ونبيل عبدالمقصود.

وعلقت شيرين على الصورة قائلة: «فخورة كل الفخر إني هقابل الجمهور التونسي في ختام مهرجان قرطاج الدولي، وإن شاء الله انتظروا أحلى حفلة، ومبسوطة إني قابلت النهارده سيادة السفير المصري في تونس وحرمه والأستاذ صابر الرباعي وحرمه ود. نبيل عبدالمقصود».