’’البهاق موجود في كل جسمي‘‘.. لأول مرة رامي جمال يتحدث عن مرضه.. ويوجه رسالة مؤثرة لزوجته (فيديو)
كتب: ضياء السقا
تصدر المطرب رامي جمال، محركات البحث جوجل، وذلك عقب ظهوره في مقطع فيديو عبر حسابه الرسمي على موقع تبادل الصور والفيديوهات "إنستجرام"، يتحدث فيه لأول مرة عن تجربته مع مرض البهاق.
وقال المطرب في الفيديو: "أنا مش بحب أتكلم في حاجة غير الفن، بس بتوصلني أسئله كتير جدا عن علاج البهاق، ودائمًا أرد عليهم في الرسائل الخاصة، أنا لم أعالج البهاق، ولكن أنا اتعالجت نفسيا منه بدعمكم ليا".
وأضاف :"كل الناس دعموني من أصدقائي في الوسط الفني، وأهلي، والبهاق طلع ميزة مش عيب، لأني شفت بسببه حب كبير، البهاق موجود في كل جزء في جسمي".
واستكمل"في بداية الأمر كنت بكون حزين وبراقب كل نقطة في جسمي، البهاق مرض مناعي، لم يجد في العلم حتى الآن علاج ليه".
وتابع :"أنا بوجه رسالة لأي أم ابنها عنده بهاق، حاولي تدعميه أنه يمتلك ميزة مش موجودة عند أي حد تاني، ووارد أن البهاق يكبر كمان في جسمه بس إيه المشكلة".
وأكمل :"أنا بشتغل مغني، وشكلي مهم جدا في عملي، وأنا مش شايف البهاق عيب، ومش بيهمني الناس اللي شايفه إن دا عيب، وربنا يعطي الناس كلها قدرة على تقبل الابتلاء".
وعلق رامي جمال على الفيديو :"البهاق ميزة، أسف لو كنت طولت عليكم بس كل يوم أكتر من 100 رسالة عن البهاق".
واستكمل «البنت اللي بتقول أنا عندي بهاق وداخله على خطوبة أو جواز وخايفة عريسي يسيبني أنا أهو بقولك متكمليش معاه لو مش قابلك، لأن مشاكل الدنيا أكبر بكتير من شوية ألوان في جسمك. أنا بقولك متتجوزيهوش لأنك مميزة، مفيش عندك مشكلة وممكن أقولك إنه بياض قلبك بان علي جسمك».
وعلقت الفنانة ناريمان، زوجة المطرب رامي جمال، على مقطع الفيديو الذي شاركه زوجها، قائلة: «أنت جميل بقلبك وأحلى وأجمل في عيون كل اللي بيحبوك وبيتمتعوا بفنك»، ليرد عليها الفنان قائلًا:"بنت الأصول الغالية".