وائل غنيم: التعصب والانحياز سيقودنا لصناعة فرعون جديد!!
انتقد الناشط السياسي "وائل غنيم" عبر صفحته على موقع التواصل الاجتماعي "الفيس بوك" التعصب الذي ظهر مؤخرا بين أنصار المرشحين لمنصب رئيس الجمهورية.
وكتب "غنيم" على صفحته قائلا: "معلش ممكن أقول حاجة وأبقى رخم شوية .. إيه موضوع الألتراس بتاع المرشحين ده؟ .. كل واحد بيدافع باستماتة عن مرشحه وكأنه لا يخطئ .. التعصب الشديد للمرشحين بيزيد دلوقتي بشكل مبالغ فيه واحنا لسه باقي لينا شهرين على الانتخابات .. لازم نبقى فاهمين إن المرشحين بشر كلهم زي ما ليهم إيجابيات ليهم سلبيات أيضا .. والعبرة في اختيارنا هي ايجابياته هي اللي مصر تحتاجها في المرحلة الحالية وهل سلبياته مش هتضر بمصر لو مسك الحكم الآن .. أتمنى منكونش في طريقنا لصناعة فرعون آخر بس بصورة جديدة عبر التعصب والانحياز بشكل غير موضوعي لمرشح رئاسي ضد الآخرين .. كفاية تمجيد أشخاص يا شبااااااااااااااااااااااب وركزوا كلامكم في المضمون: دراساته وثقافته العلمية، سابقة الخبرة السياسية والميدانية، الخطوط العريضة لبرنامجه وأهم الوعود الانتخابية اللي وعدها، قدرته على إدارة علاقات مصر الخارجية مع دول العالم، وقدرته على أن يكون قائدا مدنيا للجيش المصري لأول مرة من ستين سنة، أهم قصص النجاح اللي حققها في حياته وتؤكد أنه شخصية قائدة، قدرته على لم شمل المصريين وجمعهم في هذه المرحلة الحرجة، ارتباطه بالثورة وموقفه منها ومن أهدافها .. والقائمة تطول .. لو كلنا صبينا كلامنا في هذا الاتجاه هنساعد في تقويم أداء المرشحين وتحسين برامجهم وده الأهم".