بعد سخريته من تصريحات البطل الأولمبي محمد السيد.. إعلامية توجه رسالة قوية لـ خالد منتصر: بتتريق على خيبتك التقيلة!
الموجز
وجهت الإعلامية دعاء فاروق رسالة للدكتور خالد منتصر، وذلك بعد سخريته من تصريحات البطل الأولمبي محمد السيد، الفائز بالميدالية البرونزية في أولمبياد باريس.
وكان محمد السيد قد صرح بأن الميدالية تحققت ليست لسبب رياضي فقط، وإنما أيضًا بفضل قيام الليل وسورة البقرة والصلاة على النبي، وأكد أن الدعاء والاتصال بالله هو سبب السكينة في الملعب، وذلك وفقا لما نقلته صحيفة "الشروق".
وعبر صفحتها الخاصة بموقع "فيس بوك"، أعادت الإعلامية نشر تدوينة خالد منتصر، وكتبت تعليقا عليها قائلة: "اتمني من استاذ خالد منتصر يعمل لمصر أي حاجة مفيدة غير مصمصة الشفايف علي ناس ناجحة وملتزمة رياضيا واخلاقيا وعندها انضباط لا يكتمل أركانه الا بالرياضة والصلاه".
وأضافت "فاروق": "والله ده رد افضل مليون مرة من حد كان بيقول الحافز بالنسبة لي اني أبهر البنات في البار اللي كنت بسهر فيه ، غير انه حرام اساسا الا لأنه كمان هدف محدود ضيق لا يرتقي لمكانة شاب عاوز يبهر بلده بأكملها ... والمفروض يا استاذ خالد كان يقول انه اثناء التمرين كان بيزوغ يشرب شيشة مع اصحابه او كان يطلع يتندر بحكاياته الغرامية والبنات اللي بتحبه وبتجري وراه او مقالبه مع زمايله في غرف اللبس عشان ياخد صريخ ضحك و تسقيف في البرامج اللي بتركز علي التوافه وعشان حضرتك وغيرك يتبسطوا قوي من العيال العفاريت اللي بتيجي معاهم زى ما بتيجي مع الهبل دوبل ومع العبط طابات وتقعدوا تمجدوا فيهم ... اصل النتايج بتاعت فرق مصر ولاعيبة مصر علي مدار السنين اللي فاتت مبهرة قوي بصراحة والله ما شوفنا إنجازات ولا حد بل ريقنا بعد منتخب الساجدين".
وتابعت: "ايوة يا بيه قيام الليل وقراءة القرآن بتقوي وبتطمن وبتمد الإنسان بثبات نفسي من الداخل .. ايوة يا سعادة البيه الإيمان هو ما وقر في القلب وصدقه العمل .. اومال يبقي قوى من برة ومهزوز من جوة .. منظر عالفاضي من غير يقين بالله .. اه يا سعادة التنظيري الأكبر التدين الحق بيدى للبني ادم قوة لا يعرفها غير من ذاقها .. فمن ذاق عرف ... عامل اللي عليه وواخد كل الأسباب الدنيوية وساندها بالاستعانة بالقوى المهيمن الجبار فلا حيلة في الرزق ولا حيلة في النجاح بدون الاستعانة بالله.. استقيموا يرحمكم الله ".
واختتمت الإعلامية دعاء فاروق: "في انتظار تعليقات حضرتك الظريفة علي الفشلة لا علي الناجحين المتفوقين.... ربنا يكتر من أمثالهم يا رب ويبعد عنهم شر المتهكمين ... علي رأي تيتة الله يرحمها لما كان حد يتريق علي اي حد فكانت تقطمه بجملة مناسبة جدا في هذا الموقف بتتريق علي ايه علي خيبتك التقيلة !!!! "