عمرو أديب عن انهيار الزمالك: عاوز أعرف الدولة بتتفرج ليه؟

الموجز  

علق الإعلامي عمرو أديب، على هزيمة الزمالك بثلاثية نظيفة أمام فريق البنك الأهلي، قائلًا إن الزمالك تعرض لخسارة في 10 مباريات من أصل 17، خلال عام 2023.

وقال أديب، خلال تقديم برنامجه "الحكاية" المذاع عبر فضائية "إم بي سي مصر 2" مساء الإثنين، إن الزمالك حقق رقمًا قياسيًا عالميًا جديدًا بهزيمته في 10 مباريات، معقبًا: «مبنتكلمش عن فرقة إحنا بنتكلم على خرابة، واللي مش مصدقتي يبص للهدف الثاني، يوري لك حالة فرقة نادي الزمالك (الخرابة)».

وأضاف الإعلامي أن لاعبي الدفاع لم يتحركوا لمنع تسجيل الهدف في مرمى الزمالك، مضيفًا: «3 أهداف في 7 دقائق رقم قياسي عالمي غريب، والموضوع مش غريب لأن اللاعبين كل يوم يجدون مدربًا جديدًا كل يوم».

وأشار إلى أن النادي الثاني الأكثر شعبية في مصر والعالم العربي ونادي البطولات لا يمتلك مدربًا، لافتًا إلى أن الزمالك يتعرض لمشكلات كثيرة، فضلًا عن أن رئيسه كان موجودًا في السجن.

وتابع: "معقولة ده يتعمل في الزمالك؟ هل يمكن يكون في نادي حياته تبقى عاملة كده؟ أنت عندك التاريخ كله وأحسن لاعبين والإمكانيات والجمهور، ليه الزمالك بيتعمل فيه كده؟ إحنا إمبارح كنا بنتهان والهزيمة مهينة".

ولفت أديب إلى أن "جمهور الزمالك حزين ويشعر بالضيق بسبب ما حدث أمس"، مواصلاً: "يا جماعة اعملوا اللي أنتم عاوزينه، لكن المشهد ده مينفعش النادي دلوقتي لا أعظم ولا أكبر، إحنا بنتهان والفريق بقا تريقة".

وأكد أنه لا يستطيع تحميل اللاعبين مسئولية ما حدث، متسائلًا: "معقولة اللي بيجرى ده، ده لمصلحة مين؟ عاوز أسأل الناس المبسوطين جوا نادي الزمالك إيه اللي بيبسط في النادي وإيه اللي بيجرا عظيم؟ إيه المؤامرة اللي على النادي؟ ده إحنا قلب المؤامرة من جوا".

وأشار مقدم برنامج "الحكاية" إلى أن الوضع يتحول داخل النادي من سيئ لأسوأ، منوهًا أن النادي تمكن من الحصول على بطولة الدوري سابقًا، رغم عدم وجود مجلس إدارة في هذا التوقيت.

وواصل: "الأهلي مش منور أوي ومش في أعظم حالاته لكن الزمالك تدهور تدهورا كبيرًا، كفاية حالة الإنكار الموجودة عندنا، اللاعيبة متكسرة نفسيًا وليس بدنيًا، وأنا مالي الأهلي ياخد ولا مياخدش".

وأكد الإعلامي على أهمية إنقاذ الزمالك، متابعًا: "عاوز أعرف الدولة بتتفرج ليه؟ الدولة بتكتب على سطر وتسيب سطر، النادي ده بتاع الدولة والفلوس اللي بتضيع دي فلوس الناس".

واستنكر عمرو أديب موقف وزير الشباب والرياضة وعدم وضوحه، مختتمًا: "بيقول مش عاوزين نضايق حد ونعمل حاجة تطلع غلط بعد كده، طب هتعرف إمتى؟ طب يا جماعة كلكم مش عندكم رأي، طب الرأي عند مين؟ النادي عمره ما كان كده حتى في أسوأ ظروفنا".