«هو بقاله فترة بيتحضر لده».. أمير مرتضى منصور يتحدث عن رئيس الزمالك القادم

الموجز    

قال أمير مرتضى منصور، المشرف العام السابق على فريق الكرة الأول بنادي الزمالك، إن ممدوح عباس شن حربًا على عائلة مرتضى منصور، كاشفا أن رجل الأعمال أيمن عباس يتجهز في الوقت الحالي لرئاسة القلعة البيضاء.

وأضاف أمير مرتضى، في حواره مع الإعلامية أميرة بدر ببرنامج "أسرار" والمذاع عبر فضائية "النهار" مساء السبت: "في كتير جوا نادي الزمالك بيحاربوا عيلة مرتضى منصور، زي أستاذ ممدوح عباس، وأنا بحب وبحترم أيمن عباس، ومش عارف هو داخل في الصراعات دي ولا لأ، ولكني عارف هو بيحضر نفسه دلوقتي لحاجة تانية هتبقى موجودة في الزمالك وده حقه، هو بقاله فترة بيتحضر لده علشان يبقى متولي رئاسة نادي الزمالك، وهو بني آدم محترم، ومقدرش أحكم عليه هيبقى عامل إزاي في الرياضة، لكن أستاذ ممدوح عباس لأ وكنا هننزل درجة تانية".

وأضاف أمير مرتضى: "ممدوح عباس لا يصلح لـ رئاسة نادي الزمالك، وكل واحد بياخد فترته وزمنه وهو خد فترته وزمنه بمجلس كامل، وكان عنده كل الأدوات أنه ينجح، قعد 4 سنين وكل الكوارث اللي ممكن تحصل على مستوى عقود وصفقات ورعاية وخناقات وصراعات حصلت، مش معنى أنه مشجع زملكاوي أنه يصلح يبقى رئيسه".

وعن محاولات الصلح بين والده مرتضى منصور وممدوح عباس، قال المشرف العام السابق على فريق الكرة الأول بنادي الزمالك: "أستاذ عمرو الجنايني وأستاذ مدحت العدل، لما كنت حلقة الوصل قولت إيه رأيكم نجيب أستاذ ممدوح عباس، ونصالحه على المستشار مرتضى منصور، ويتنازل عن القضايا بتاعة الحجز على الأرصدة ويتبرع للنادي، بدل ما بيصرف كل الفلوس دي علشان يمشينا يصرفها على النادي، وهعمل له تمثال في النادي والمبنى اللي كان فيه هسميه بـ اسمه، وهسمي ملعب بـ اسمه وهعمل له اللي هو عايزه."

وتابع: "ممدوح عباس عمل عملية كبيرة في المخ، ودخلت له أوضة العمليات وسلمت عليه وبوسته وألف سلامة عليك، ومحدش يعرف الكلام ده ودي حاجات إنسانية، وهو قعد يهزر معايا والسن له احترامه، وكان ساعتها المستشار مرتضى في السجن وقالي روح زور ممدوح عباس علشان عامل عملية، رغم أن هو في السجن وماحدش زاره."

واختتم أمير مرتضى منصور: "ممدوح عباس بيحاربنا الحرب دي، لأنه شايف أن المستشار مرتضى منصور أخد مكانه، مع أن المستشار عضو مجلس إدار من سنة 1992، وأستاذ ممدوح عباس بيتعامل أنه مشجع زملكاوي من سنة 1972، وهو صرف كتير أوي على الحرب دي، صرف على إعلاميين وسوشيال ميديا وناس بتطلع لايف وخدنا عليهم كلهم أحكام زي عبد الناصر زيدان، واتنازلنا عنهم، وعبد الناصر زيدان راجل محترم وقال للمستشار سامحني أنا اتزقيت أني أغلط في حقك."