هاشتاج "نصيحة مصرية للكوايتة": وزعوا زيت وسكر من دلوقتى..اللي يقولك سنحيا كراما متصدقهوش قوله وريني باسبور الحاجة

دشن عدد من النشطاء هاشتاج ساخر بعنوان "#نصيحة_مصرية_للكوايتة"، وذلك عقب التظاهرات التي شهدتها الكويت أمس الأحد.

ومن أبرز التعليقات:

-بعد نجاح الثورة حتلاحظو وجود "بلوفر" يتنطط في التلفزيون كل شوية اسحلووووووووه

-اللى يقولك على فكره (انا مش اخوان بس) قبل مايكمل بعد (بس) اديلوا باللى فى رجلك صدقنى هتفرق كتير

-لو قابلت واحد قالك إيد واحدة ..انزل بضهر إيدك على وشه!

-توخوا حذرا من الاخوان الكويتين :)

-ماتنضفوش الشارع بعد ما تخلصوا عشان هتنزلوا تاني :)

-وزعوا زيت وسكر من دلوقتى , عشان هتفرق معاكم بعدين

-النصيحة الاخيرة بقي: فيه حاجة بتلمع من بعيد اسمها نهضة. اياكم ثم اياكم الاقتراب منها. طلعت سيفون وبايظ كمان.

-اللي يقولك "سنحيا كراما" متصدقهوش " قولوا وريني باسبور الحجة"

-لوالبرادعي بتاع الكويت قال لمني الشاذلي بتاعه الكويت بردو مفيش حد هيضرب علي قفاه تاني.اعرفوا انكوا هتتسكوا علي قفاكوا

-الفوتوشوب مش بتاع فيديوهات .. اظن وصلت !

-فرصة والنت شغال .. جهزوا كام اى بى كده قبل ما الحكومة تقطع عنكم الفيس وتويتر

-اوعوا يضحكوا عليكم ويقولوكم هنعمل استفتاء .. ولو فى استفتاء قولوا .. لاااااا

-لو عندكم إخوان مسلمين يا ريت تحطوهم في الصفوف الأمامية ويتضربوا هما لأنهم كدة كدة هيقولوا أن هما اللي عملوا الثورة

-بعد الثورة ما تنجح والامير ما يطير هيعملوا مجالس بقى مدنية عسكرية الكلام ده مياكولشى معاك خليك ناصح ومتمشيش من الميدان

-أعدموا أي فرد كاوتش عندكم ، الإخوان هيجيبلكم ستبن و يقولولكم عليه رئيس !!

-اللى يقولك اى حاجة و الشعب ايد واحدة متصدقوش

-ادبحوا النظام و الفلول والاخوان والنخبه وخلوا حد من الشعب الغلبان يحكم

-هيبقى عندكم فلول واخوان وعسكر وثوار وحزب الكنبه وعكاشه ومرتضى ودوشه كتير :)

-أي حد مشغل قناه العربيه أو الجزيرة ولع فيه هو والرسيفر وبعد اول خطاب ولع ف التليفزيون كمان

-خليك من بتوع حزب الكنبة و اتفرج علي الثورة فيديو علشان كده كده هترجع للكنبة

-أوعوا تروحوا عند وزارة الداخلية :O الداخلية هتنفخكوا هناك تحت إسم انكم بلطجية !

-أوعي تفرح بالجيش لما ينزل ويمسك السلطه المجلس العسكري :)

-انتخبوا الطرف التالت و قصروا عشان من الآخر مبيتمسكش و حيطلع عين أهاليكو لو قاومتوه. و بلاش اى حاجه فيها نهضة أو طائر !

-عندكوا واحدة كده شبه عفاف شعيب.... 2 كيلو كباب و كفتة تبعتوهولها والا هتفضحكوا”