تركت رسالة منزعجة.. توفيق عبد الحميد يكشف موقفا جمعه بشيرين عبد الوهاب

وجه الفنان توفيق عبد الحميد، رسالة دعم إلى الفنانة شيرين عبد الوهاب، عقب كشفها طبيعة علاقتها مع طليقها حسام حبيب.

وروى عبد الحميد، موقفا إنسانيا جمعه بشيرين عبد الوهاب عقب تداول شائعة عمله سائقا للتاكسي، وكتب عبر حسابه بالفيس بوك: "شيرين عبد الوهاب، سمعت الخبر ولأن قلبها بيسبقها كلمتني، وتركت رسالة منزعجة فيها بشدة حنونة ورقيقة، وتطلب أن أكلمها وأطمنها، وأنا أساسا بعشق صوتها وبحب عفويتها وطيبتها، بنت بلد وجدعة موهوبة وإضافة كبيرة لتاريخ الطرب".

وتابع: "المهم اتكلمنا وقتها وطمنتها وبعدين كلمتها مؤخرا علشان أطمن عليها مردتش".

الفنان الكبير أضاف: "وعايز أقولها اعتبرينى أبوكى أو أخوكى الكبير وطمنيني عليكي علشان أنا بحبك وقلقان عليكي".

وفي مداخلة هاتفية ببرنامج "كلمة أخيرة" الذي تقدمه الإعلامية لميس الحديدي والمذاع عبر فضائية "on" ، قالت شيرين عبدالوهاب: "موضوعي بوخ لكن طالما الناس عارفة موضوعي من الأول، فأنا عاوزة أستغفر ربنا على الكذب اللي كذبته علشان أخلي صورة إنسان تبقى كويس".

وأضافت الفنانة شيرين عبد الوهاب معترفة بكذبها في تصريحاتها بشأن طليقها حسام حبيب : "أنا كذبت رغم إني مش بحب الكذب.. كذبت في حاجات كتير علشان انا بنت أصول وعلشان أرفع صورة إنسان رغم إنه ممكن يروح في أي يوم يتجوز من عائلة تانية .. على الأقل يتجوز وأخلص منه.. لو كنت فضّلت أقول عليه كلام وحش مكنش هيعرف يتزوج.. أنا شخصيا نفسي يتجوز ويغور ويبعد عني".

وأوضحت تفاصيل تحملها لظروف صعبة هى وبناتها قائلة : : "أنا كنت قاعدة في أمان الله مع ولادي اللي شايفين الويل.. سافرنا الساحل نقضي أسبوع علشان نفسيتنا التعبانة.. بناتي مكنوش بيعرفوا يقعدوا معايا، وظروفي كانت صعبة.. كنت عايشة مع زوح مش بيشتغل.. كنت محبوسة 24 ساعة في غرفة نومي.. قاعدة بس".

وأكملت: "أنا غلطت في نفسي، لكن مش عيب إن الست المشهورة تكون متجوزة وبتحاول تحافظ على بيتها.. كنت فاكرة إني بحافظ على بيتي لكنه مكنش بيت، دي كانت مصيدة فئران.. أنا كنت عايشة عيشة الفار اللي دخل مصيدة فار علشان ياكل حتة جبنة لغاية ما يموت".

وتابعت اطلقنا طلاق بائن لما قصيت شعري.. بعد ما هديت من الكارثة اللي حصلت حسيت إني مش قادرة أستغنى عنه وإني أديله فرصة تانية وكل اتنين مع بعض لما بيسيبوا بعض بيكون فيه فجر في الخصومة.. علاقة الزواج مقدسة لازم نحافظ عليها".

وأضافت: "أنا كنت بحبه وفاكراه ابني مش بس زوجي.. اهتمت بيه وعملت استوديو علشان شغلنا يتعمل فيه.. اشتريت له كل الأغاني اللي عجبته بشيكات باسمي علشان أضمن له الأغاني دي متروحش منه".

وتابعت: "لقيت بعد كده إنسان بيتهمني إني بقيت شبه أمه وإنه عاوز واحدة يتباهي بيها قدام الناس تبقى حلوة ورفيعة وكده.. كان فيه خناقات بالضرب والسحل على الأرض وشتيمة عمر ما فيه إنسانة تقبلها على نفسها".

وأكملت: "بعد طلاقنا قلت أديله فرصة تانية بس بشروط وهو وجود بيت غير بيتي وحياتنا تبقى لوحدنا ويشتغل.. أنا عندي بيت كبير وكان بيجي يزورنا كتير قبل الزواج.. وكان بيتردد على البيت علشان كان فيه بيننا شغل في الاستوديو في البيت، وكنت بحاول أعمل تمهيد للبنات إنه مخرجش من حياتنا وإنه لسه بيخلي باله مننا لغاية ما بدأت الوعود تختفي وتتلاشى".

وذكرت شيرين: "المشاكل رجعت تاني وقلة الأدب رجعت تاني بدون سبب.. أنا لما بتعصب ممكن أسبب أذى لنفسي .. وطبيبي الدكتور محمود مرسي نصحه إن في اللحظة دي إما يسيبني ربع ساعة أو أدخل الأوضة لغاية ما أهدى.. كانت في كل خناقة يفضل قدامي يحرق في دمي وأعصابي لغاية ما أمسك الماكينة وأحلق شعري".