كيف يتعامل المجلس العسكري مع تظاهرات الشعب , وكيف يتعامل مع رجال الشرطة؟؟!!
حد شاف اعتصام أمناء الشرطة أمام مديرية الأمن وقطعهم للطريق ؟
شارع الجمهورية وهو الطريق الرئيسي في المنصورة متوقف تماما .. حركة المرور في المنصورة في حالة شلل تام بدءا من طلخا وعلى المشاية !
ايه رأيكم في المرور اللي في حالة انهيار كامل بسبب متاريس أمناء الشرطة ؟
ياترى فين الشرطة العسكرية وعربيات الجيش اللي كانت بتهددنا في اي وقفة سلمية؟
فين الامن المركزي وعربيات الامن المركزي ؟ فين قنابل الغاز ؟
ياترى فين تهديدات المجلس العسكري بالضرب بيد من حديد على من يريد تعطيل عمل المؤسسات ؟ ياترى فين كلام المجلس العسكري عن تعطيل مصالح الشعب ؟
ياترى فين قوانين تعطيل مصالح العمل ؟ فين الصوابع يا لواءات المجلس العسكري ؟
ولا الصوابع والتهديدات دي بس على الشعب المسالم ؟
ايام الثورة نفسها .. وايام المظاهرات .. عمرنا ما عطلنا اعمال حد ولا وقفنا طريق .. بالعكس .. ايام المظاهرات الضخمة كنا عاملين خطة مرور بديلة قدام المحافظة ..
دلوقتي أمناء الشرطة قافلين الخط المروري الرئيسي و "الوحيد" في المنصورة .. مفيش له طرق بديلة !
هل المجلس العسكري يعرف ان أسعار الميكروباص زادت الضعف ؟
هل المجلس العسكري يعرف ان اجرة التاكسي زادت 3 اضعاف ؟
هل المجلس العسكري يعرف ان الموظفين مش بيرجعوا بيوتهم وقت الراحة ؟
هل المجلس العسكري يعرف ان طلبة الجامعة بيقفوا 3 ساعات على الاقل علشان يلاقوا مواصلة ؟
وطبعا سيادة اللواء -محافظ الدقهلية- الموضوع أصلا مش في دماغه .. بيشرب شاي بالياسمين في مكتبه المكيف ..
ياترى فين الناس بتوع الاستقرار وعجلة الانتاج وخربتو البلد ؟ فين الناس اللي كانو بيبعتوهم لنا يشتمونا في الوقفات ؟ فين الستات اللي كانت بتيجي "مخصوص" علشان تدعي علينا ؟ فين الراجل اللي كان بيجي "كل مرة" يطلع من شباك العربية ويشتمنا بأفظع الألفاظ ؟
ياترى لو اللي كان قطع الطريق كانوا بيتظاهروا علشان حقوق الشعب مش مطالب فئوية .. ياترى كان السكوت بالشكل ده ؟
------------------
انشروها ... ليشاهد العالم كيف يتعامل المجلس العسكري مع تظاهرات الشعب , وكيف يتعامل مع رجال الشرطة !
صفحة حركة شباب 6 إبريل بالمنصورة