شفيق مش برىء

 

شعر لطارق أحمد مصطفى

أحمد شفيق

مهواش برىء

ده صاحب عدوّى

وعامل صديق

وفى لسه ناس

تقولك خلاص

وعايزينا نفضل

فى نص الطريق

 

يقولك حوار

ويطلع هزار

يقولك كفاءه

وبانى المطار

نسيبه يجرّب

يطرمخ يهرّب

دى تبقى الغباوة

بحق وحقيق

 

بنبونى قال

فاكرنا جنابه

شوية عيال

يصدّر صداغه

يكبّر دامغة

وينسى السؤال

ويلبس بلوفر

ويعمل خنيق

 

يغير كلامه

وعنه يحاموا

عشان لو تناموا

يلملم نظامه

يدارى فضايحه

ويعمل حريق

 

كبّر يا مان

خلاص كان زمان

وبعد اللى بان

ما عدناش خلاص

حندى الأمان

معدناش حنسكت

معدناش نطيق

 

معدناش حنسكت

سكوتنا حرام

حنفضل نطارد

بواقى النظام

دى ريحة فسادهم

تجيب الزكام

وجيشنا معانا

رجاله العظام

نقول له ينفذ

ويدى التمام

ما حدش حيقدر

يغير ما بيننا

ده أحنا وهما

نشكل فريق