فوزي الرشيدي يكتب: دستور قندهار بطعم الفتة!
اللجنة التحشيشية للدستور خرجت علينا من مطبخ العك السياسي بمنشور عن الدستور الجديد وهو أشبه بصينية فتة دستورية ولكن مدسوس بها كل أنواع مكسرات الإرهاب الفكري الوهابي والأفكار الطائفية المتزحلقة فوق غلاف الشرع ولكن الخلاف ليس على الشرع الخلاف على من يطبقون الشرع ، إنه دستور يخدم مصلحة جماعة متآسلمة ولا يخدم مصلحة إسلام ولا وطن ولا أي دين ولا حرية ولا رأي بل صينية الفتة الدستورية لهم فقط لكل من أكل معهم أو منهم فى المطبخ الإخوانى السلفى السياسي فهو آمن وطبعا الفاتورة على حساب الشعب ، والشعب يغسل الأطباق فى الصندوق بنعم للجنة ولا للنار وطبعا بمسحوق الغسيل العقلي اللي بيصنعوه في مصنع الإرهاب الفكري التابع لهم ولخدمة مصالحهم ، كيف لهولاء أن يكتبوا دستور تاركين فقهاء الدستور والقانون.
سوف أتكلم فقط عن مادتين فىي الدستور وطبعا هو مكتوب في صيغة 48 مادة وكلهم عبارة عن كبسولات سامة لكن كل مادة على حسب خدمتهم والمادة الفعالة لمصالحهم وطظ فى الشعب ياخد مسكنات عادي ..
أولا المادة 14-( تكفل الدولة التوفيق بين واجبات المرأة نحو الأسرة وعملها فى المجتمع ، ومساواتها بالرجل فى ميادين الحياة السياسية والاجتماعية والثقافيه دون إخلال باحكام الشريعة الإسلامية ) عاوز اعرف بقى مين اللى هيحدد إنها تبع الشرع ولا لأ! وكمان هى المرأة كانت قبل كدة عايشة في بيت أبو لهب وعاوزينها تعيش في الدين الجديد ولا هما عاوزينها عبارة عن جارية فقط لها بيتها وخلاص ويتزوجن في سن التاسعة والشرع بيقول تتجوز 4 ، وطبعا المادة سوف تفعل بطريقتهم ، هما نسيوا إن الست دي كانت في الثورة وهي اللى وصلتهم انهم يكونوا أصحاب قرار.
ثانيا المادة 46 ( الرموز الوطنية المعنوية واجبة التوقير والإحترام ويحذر ازدرائها وفقا للقانون ) وطبعا الرموز دى ستتحول بقدرة قادر لكل ماهو رمز متآسلم بمعنى مفيش خروج عن الحاكم وإياك تقول رأيك هانقطع لسانك ونسجن حريتك أو بمعنى إخرس ياشعب ، وطبعا هيقولك ما هو الشعب هيستفتى على المواد دى وأصلا الشعب مش عارف يعني إيه مواد ويعني إيه دستور إلا من رحم ربي من مثقفي البلد والغير مطبلين مهللين مبررين ، لكن اللي هيعرفوه إن نعم للجنة ولا للنار، وإن الصندوق قال كلمته وغزوة الصناديق وصوت جاهل واحد كفيل بضياع أمة كاملة.
وأخيرا أحب أقول معركتنا هى عدم تمرير هذا الدستور النووي رغم أعمال لفت الانتباه وتشويه الشرفاء لكن إصحى ياشعب واصحوا يا شباب الثورة .. معركتنا هى الدستور .. مصر رايحة لقندهار آخر فى الفكر وصومال آخر فى الحياة ، لا ولم ولن نتركهم يسرقوا مستقبلنا كما سرقوا ثورتنا .
ولازم تفهموا ‘ننا عملنا ثورة وضحينا فيها ومعملناش ثروة عشان تتوزع عليكم .
الله .... الوطن ....حق الشهداء......الثورة