هالة منير بدير تكتب: سيادة المشير اسْبِلَّها كده

رحمنا الله من الكوارث الطبيعية ، فلا عندنا أعاصير ولا براكين يادوب يعني زلزال ولا موجة برد كل فين وفين .. لكن الكوارث اللي بإيدين البشر اللي عايزين الذبح بجد دي بقى اللي مالهاش حل يعني اليابان فاقت من تسونامي والانفجار النووي وأمريكا بتسيطر على الخراب اللي بتعمله الأعاصير عندها وأستراليا تقدر تسيطر على حرايق الغابات لكن إحنا لعنة الفراعنة اللي مسكتنا من ساعة ما الفرعون الحديث اتخلع اتحطت علينا ومش عايزة تنزاح على إيدين المجلس العسكري ..
والله لولا البلد في مصيبة والألم والحزن الشديد اللي جاني وأنا أشاهد الهمج اللي قتلوا زينة الشباب في بورسعيد كنت هاموت من الضحك وأنا باسمع تصريحات المشير وباشوف طريقة ردوده  وافتكرت ساعتها يونس شلبي رحمه الله في مدرسة المشاغبين ليجسد شخصية رئيس مصر الحالي (المشير ) في تصريحاته بعد موقعة الألتراس وما حدث فيها من مجزرة ، واللي زاد وفاض النهاردة إن مفيش حد من المجلس العسكري طلع وأدلى بتصريح عليه القيمة يليق بالأحداث اللي كانت النهاردة في اليوم التالي للمذبحة في شارع منصور والسويس وبورسعيد مع سقوط شهداء أكثر ..
كل اللي قام بيه سيادة المشير استقبال لاعبي النادي الأهلي زي ما كان المخلوع وأولاده بيعملوا ، ما راحش جنازة شهيد واحد من ال 75 اللي ماتوا ما طلعش بنفسه يقدم عزاء رسمي لشهداء مصر ؟ لأ .. ليه ؟! .. لأننا ما نستهلش .. لأن اللي مات بلطجي .. كل اللي شفناه بيان هزيل على صفحة المجلس العسكري ليس فيه كلمة تواسي أم شهيد أو تتوعد الفاعلين أو حتى كلمة عزاء في أكثر من سبعين روح طلعت لخالقها ، تقريباً عاملين له Copy   و Paste  من بيان سابق ، منتهى التخاذل وانعدام الدم وقلة الاحترام لدماء وأرواح راحت سُدى .. واضح جداً أنها لم تذهب سُدى عندهم فقد أخذوا بثأرهم البائت مع ألتراس الأهلي الذي ساند الثورة في محمد محمود ومجلس الوزراء كما كانوا يأخذون بثأرهم من النشطاء السياسيين في الأيام الأخيرة التي سبقت المجزرة اللي بيحتفلوا فيها بالعيد الأول لموقعة الجمل اللي مامتش فيها زي ما مات في موقعة الألتراس ببورسعيد ..
وأعود لأتذكر تصريحات المشير حين يجسد شخصيته يونس شلبي :
( مصر ماشية في الاتجاه اللي مخططين ليه ، مش حاجة زي دي اللي توقع مصر ) ..
-         " قول البتاعة دي وأنا أقول "..
( المفروض الشعب كله يشترك في حاجات زي دي .. الشعب ما يقعدش .. الشعب المصري ساكت ليه .. لازم الكل يشترك .. ) .. يا نهار إسود المشير ما بيجمعش !! ..
-         " مش إنت اللي بتجيب لندن ؟! ألف مبروك يا مرسي ..المفروض ما تقعدش معانا تروح تجيب الناس اللي جاية من برة "..
( دي حوادث ممكن تحصل في أي مكان في العالم ) .. أنا عايزة جملة مفيدة قولي جملة علشان أفهمك ..
-         " دا أمي بتدعيلك .. مش كان بيكلمك إنت !! مش إنت قلت البتاعة اللي قلتها دي وقلت هيييييه .. إعمل الشريط كله وأنا أقولك أهيه " ..
( مش هانسيب اللي عمل كده .. أو اشتركوا في مثل هذه الأحداث وأمن مصر إن شاء الله يعني سليم.. وهيستمر إن شاء الله وكل حاجة هتبقى كويسة) ..
-         " هُوَّ المذيع مش اللي عاملهالك ؟ هُوَّ مش مذيع ؟! "..
ولما سأله المذيع عن المتوفين ( " يبلع ريقه وإحم " وهنشوف وهنبحث موقفهم وإن شاء الله هنديهم التعويضات لأهاليهم ) ..

وعندما سأله نفس المذيع برضه : هل نتوقع إقالة المحافظ أو مدير الأمن في بورسعيد ؟!
-         ومن بُق يونس شلبى ربنا يرحمه : " قولي بس يا مرسي أحسن حد يسألني فيها أبقى محرج " ..
 (دا موضوع مش وقته دلوقتِ ومفيش حد خد قرار بكده وكل حاجة نتيجة التقرير اللي هيتم )..

المشير بيتكلم لغات يا رجالة !!
عندها أقول له كما قال  سعيد صالح ربنا يديله الصحة : "ستنضنضم" قوى شباب الثورة لبعضها من تاني والدم اللي سال ده مش هيروح هدر وكل اللي بيقول إن اللي حصل مش مسئولية الداخلية والمجلس العسكري كفاية قوي يذاكر لولاده منهج إبتدائي ويدور لهم على مدرس بيفهم شوية علشان العيال تتعلم صح لأن العقليات اللي لسه بتخون ما عادش ينفع تتكلم لأن بقى شكلها مش بس بايخ دول شكلهم بقى غبي كمان فيا ريت يتواروا عن الأنظار لأننا فعلاً قِرفنا ..
مرسي ابن المعلم زناتي مش هيتهزم يا رجالة والأمارة هتافات الشعب : يسقط يسقط حكم العسكر والشعب يريد إعدام المشير ..

علشان خاطرنا عايزين رئيس يعرف يتكلم وبالذات وقت المصايب .. سيادة المشير لو سمحت خد النصيحة دي مني لا تدلي بتصريحات على الهواء من غير ما سيادة الفريق عنان يبقى واقف جنبك تاني زي كل مرة ..  انجليزي دا يا مرسي ؟! .. طب اسبِلَّها كده ..

أصل المقال على مدونة هالة منير بدير