جيهان فاروق تكتب: أبحث عن خروج آمن من المنزل يوم 25 يناير

إااااحم إاااحم ... عاوزة أقول لكم حاجة بـــس ما تضحكوش على حالي.. 

أنا أبحث عن خروج آمن من المنزل يوم 25 يناير..

طبعاً مش مشكلة مع نفسي ولا مشكلة إني مش حاسمة موقفي ..لا آبـــ سولوووتلي..

المشكلة مع ماما وبابا يا شباب..

آآآه تخيلوا أنا مش خااايفة من العسكر ولا من اعتقال ولا من تخوين بعضهم لــــنا..

آآآه كل خوفي من خناقة بابا وماما..

وعلى فكرة هما مش ضد الثورة ولا ضدي والحمد لله هما واثقين فيا بــــــس هما بيخافوا علي أوووي جداً خالص لدرجة الخنقة..

وأنا مش بحب أزعلهم.. دايما لما أنزل ويتصلوا بيا بطمنهم عليا ومش بتأخر علشان ما يقلقون عليا..

بــس طبعاً نظراً لانتشار نظرية المؤامرة .. وحملة التخوين والاعتقالات على الثوار..

أهلي مثلهم مثل أي أب وأم بيخافوا عليا وشكله كده فيه مخطط عائلي لاعتقالي بالبيت في هذا اليوم..

أعمل أيه يااااخوااااتي أنا لو ما نزلتش مش هاحترم نفسي .. وهافضل حاسه طول عمري بالتقصير في عدم مشاركتي..

حدش عنده كلمتين يمسوا القلب لهم مفعول السحر على بابا وماما يخليهم يقول لي انزلي ويا ترجعي منصورة يا ترجعي شهيدة..

أنتظر ردكم بــس بالله عليكم تفيديوني باللي ينفع..

مش عاوزة كلام زي أقعدي ومش هتيجي عليكي واليوم ده ملامحه مش واضحة .. 

ومش عاوزة كلام قاسي على أهلي هما  مش قاسيين عليا هما بس خوفهم عليا أكبر من حبهم ليا .. متفقين؟

 يلا هستنى ردودكم ... وياااااسلام لو يكون كاتب روائي أو محاااااامي ( حقوق إنسان )

جيني الثائرة اللي مش عارف تتمرد على أهلها