مذيع يثير موجة غضب بعد دعوته للتبرع لإتمام زواج شاب اغتصب فتاة بدلا من محاكمته.. وكاتب صحفي: دا اسمه تستر على الجريمة

كتب: ضياء السقا

أثار المذيع علي فايز، ‏مقدم برنامج طريق الخير على السوشيال ميديا، موجة من الغضب، بعد دعوته للتبرع لإتمام زواج شاب اغتصب فتاة، حُكم عليه عرفيا بالزواج منها، بدلا من القبض عليه ومحاكمته على ما اقترفه.

ونشر فايز البوست على صفحته على الفيس بوك: وجاء كالتالي: "استروها ربنا يستركم... اعتدى عليها والناس اجبروه يتجوزها.. وفرحها بعد ايام اللي يقدر يساعد بغسالة او تلاجة او اي مفروشات حتى لو قديم هي راضية، كلمونا لو عايزين توصلوا الحاجات بنفسكم".

بعد ذلك تعرض فايز لهجوم حاد من رواد السوشيال ميديا، بسبب دعوته لاتمام زواج الضحية من المغتصب، بلا من محاكمته، كي يكرر غيره ما فعله الشاب مرة أخرى.

وبرر فايز موقفه قائلا: "هو حد هيرضى يتجوزها بعد ما عمل كدا، ولو حد رضى يتجوزها هل هيعاملها حلو ولا هيرجع يذلها بسبب غلطة ملهاش يد فيها؟".

وبعد الهجوم، قام المذيع بتعديل المنشور، وحذف الجزء الخاص بأن الفتاة مغتصبة وستتزوج من المغتصب، واكتفى بجملة "الفتاة لها ظروف خاصة".

ثم حذف المذيع المنشور نهائيا من على صفحته، قائلا: "تم حذف البوست لأن أهل الخير وفروا جهاز العروسة بالكامل والحمد لله جزاهم الله خيراً وأي أجهزة هتيجي زيادة هنجهز بيها بنات أيتام".

ورد المذيع على الهجوم قائلا: "الناس الجميلة اللي عمالة تهاجم وتقولي تستر وعايزين يحبسوني كمان ،، حضرتك البنت حامل ، يعني لو اللي غلط معاها سابها هنبقى دمرنا الطفل اللي جي ويحصله زي الاطفال اللي بتترمي في الشارع ويبقى مجهول النسب ،، ارحموا تراحموا ،، احنا بنقوم بدورنا الانساني والاجتماعي ،، واللي يغلط حسابه على ربنا ،، من كان منكم بلا خطيئة فليرمها بحجر ،، والله العظيم بعض الناس بأفعالها وكومنتاتها حرفياً بيكونوا مناعين للخير ،، أنا بالنسبة لي وضعي القانوني مليون في الميه ووضعي مع ربنا مليون في الميه ،، علشان كدا مكمل في طريقي مهما حصل لكن فيه ناس تانيه بتبطل تمشي في الخير بسبب السلبية والهجوم اللي غير مبرر وللأسف بيكونوا فاكرين انهم كدا بيتكلموا في الحق او بيدافعوا عن قضية".

وتابع: "أشهد الله العلي العظيم لا أخشى في الله لومة لائم وانا فعلاً والله ولا حضرت شيء ولم أوافق على شيءٍ بل بالعكس عرضت على الأم المساعدة واتصلت بالجهات المعنية وقالوا ان البنت وحدها هي من لها الحق للمطالبة بحقها تتصل هي شخصياً ، وهي طبعاً موافقة بالزواج هي وامها واهلها وليس لنا دخل ،، لم نقم سوى بدورنا في المشاركة المجتمعية والإنسانية أتمنى قرأة التعليق قبل الجدال دون تحقق وانا انتهيت من الأمر ومش عايز افتحه ،، بس للأسف حملة معمولة من البعض وعمالين ينزلوا بوستات واتصالات ومكالمات ،، وشكراً".

وعلقت مغردة تدعى نيرمين على الواقعة قائلة: "دا طريق الخير جدا.. ياللا نكافيء المغتصب ونجوزه ونشتري له الأجهزة والعفش كمان عشان يغتصب تاني !".

وتابعت: "قال لك أصلها لو اتجوزت واحد تاني هايذلها.. لكن لما تتجوز المغتصب هايشيلها في عينيه طبعا !".

 

فيما قال مغرد أخر يدعى أحمد: "في مغتصب اغتصب بنت في مصر، طبعاً المفروض مكانه الحبس وإنه يتحاكم، الناس أجبروا الشاب يتجوز البنت على أساس انهم شايفين كده *ستر للبنت*. وبجد دي حاجة أنا مشوفتش زيها في حياتي وياريت اللي يقدر يساعد البنت دي حقها يرجع والمغتصب بتقبض عليه ومتتجوزوش يعمل كده.. رعب والله".

 

من جانبه، علق الكاتب الصحفي، بهاء حجازي على الواقعة، وكتب على حسابه بالفيس بوك:

-فيه مذيع من مذيعين الشارع اسمه علي فايز .. علي نشر بوست شديد الخطورة.. وهنقلك نصه : "استروها ربنا يستركم... اعتدى عليها والناس اجبروه يتجوزها.. وفرحها بعد ايام اللي يقدر يساعد بغسالة او تلاجة او اي مفروشات حتى لو قديم هي راضية، كلمونا لو عايزين توصلوا الحاجات بنفسكم".

-يعني انت عندك واحد اغتصب واحدة.. طيب يلا نعاقبه .. لا مش هنعاقبه .. احنا هنجوزهاله .. وهنجزهاله.. وهو هيخش الجوازة بمجهوده..

-عزيزي الشاب .. لو معجب بواحدة .. اوعى تروح تتقدم ... انت تغت*صبها.. هيجوزوهالك والاستاذ علي هيلملكم تبرعات ويجهزهالك إن شاء الله..

-دا اسمه تستر على الجريمة.. وانت على علم بواقعة اعتداء جنسي.. وانت كمان بتشحت عليها..

-يا عم ما تفهم .. هو حد هيرضى يتجوزها بعد ما عمل كدا .. برافو .. انت مش ملاحظ ان فيه ضحية انت شيلتها الليلة كلها .. يعني شخص تم الاعتداء عليه .. فانت هتجوزه للشخص اللي اعتدى عليه .. حاجة اشبه ان حرامي سرق شقتك فانت تكافئه وتجيبه يسكن عندك والحجة ان مين هيرضي يشتريها وهي مسروقة قبل كدا... الشخص دا هيتجوز شخص مغت*صب وابن كلب ... ممكن بكرا يغتصب ست تانية.. والاستاذ علي يجهزهاله ويجيبهالها في البيت كمان وهكذا وهكذا..

-الشخص دا هيتحرم من الفرح ... وهيتحرم من جهازه لان ابننا معلش يعني هو مغتصب بس مش عنده فلوس يجهز نفسه فاحنا هنشحتله بقى ..

-قصة قميئة ومقززة ومقرفة لابعد حد .. مقرفة لكل اللي شارك فيها...

-فيه شخص بيحاسب على كل المشاريب علشان هو الطرف الاضعف.. واحدة مضطر تعيش عمرها مع الشخص اللي اغتصبها لانه برافو عليه نجح واغتصبها..

-دعوة لكل الشباب .. اغتصب انت وملكش دعوة.. باذن الله هنجوزك ونجهزك وتفرج وتنبسط وتعيش وترمي تستيرونك على بنات الناس..

-دا لا شرع ولا دين ولا اخلاق ولا قانون .. دي وساخة...

تعليقات القراء