السيسي يقاطع وزير الزراعة: يعني الـ60 ألف فدان مبيتحسبوش عندك؟ (فيديو)
أحرج الرئيس عبد الفتاح السيسي، وزير الزراعة السيد القصير، بعد تجاهل الأخير حجم المشروعات الزراعية التي يتم تنفيذها والتكلفة الضخمة لتلك المشروعات.
وقاطع الرئيس السيسي، وزير الزراعة، أثناء كلمته، خلال مؤتمر "حكاية وطن"، قائلا:"نرجع للكميات فيه كميات انا كاتبها يا وزير الزراعة ليه انت مش كاتبها؟ يعني الـ60 ألف فدان مبيتحسبوش عندك؟ انت قلت توشكى وشرق العوينات وسيوة؟ فين كوم امبو وباقى المشروعات اللي بتتفذ؟ انت في الأرقام اللي ذكرتها بتاعت الإصلاح المتعلقة بتاعت الاستصلاح انت بتقول الفدان بيتكلف 250 ألف فدان وانت بتكلم في 4 مليون فدان يعني كام؟ يعني تريليون جنيه، وانت كاتبهم ليه قليل كده في العرض ومش عايز تشير ليهم وتقولهم؟ صحيح انا بكلمك بجد، ارجع كده معلش، يعني انت النهاردة عندك في اللاهون وبني سويف والمنيا وكوم امبو مقلتش تلك المساحات يعني 4 مليون فدان، انا بقول الكلام ده انا عارف انك عارف حاجتك بس هو بيتكلم علي اللي هيدخل حيز الإنتاج خلال العام الزراعي فقط لكن احنا بنتكلم عن اللي مخططين له خلال عامين، لما انت تتكلم انك تضيف 4 مليون فدان في أرض ظروفها مفيهاش مياه ممطرة علي مدار العام ومش مهيأة، احنا علشان نعمل مشروع توشكى هناك حائط صخري في 7 كيلو فضل موقف المشروع الـ20 سنة اللي فاتوا، يبقى لازم يا وزير الزراعة تذكر رقم تكلفة التريليون جنيه، ولما انت مقولتش الرقم انا اتخضيت قلت هو مش عايز يقول لي؟".
ورد وزير الزراعة:"احنا عندنا منطقة اخرى فيها 600 الف فدان و1.1 مليون فدان مستقبل مصر في طريق الواحات وعندنا أكثر من 250 ألف فدان في كوم امبو".
وعقب الرئيس السيسي:"انا محطتش بالمناسبة الـ1.5 مليون فدان لإني اعتبرت إن القطاع الخاص هو اللي بيقوم بيهم فالبتالي استثماراته هو اللي بيدفعها، ولكن انا بتكلم عن ارقام ضخمة تصل الي تريليون جنيه في مشروعات زراعية الدولة بتقوم بيها، ولو انت جيبت الأفلام بتاعت شق الترع ومحطات المعالجة المياه ومحطات الرفع العرض بتاعك هيبقى في حتة تانية خالص، عارف انا بقولك كده ليه علشان بنقول للناس فيه امل وثقوا فينا وانتوا أصحاب الأمل وده اللى اتعمل خلال 4 سنين الأخيرة مش من أول ما بدأنا، احنا بنتكلم في 4 مليون فدان خلال 4 سنين أيوا ممكن ينتجوا مشكلتنا في عملية تسويق القدرات اللي الدولة بتقوم بها، مش علشان تقولوا الحكومة بتشتغل كويس ولكن علشان نقول للناس اللي موجودة في مصر لأ بصوا، الـ4 مليون فدان يشغلوا ناس كتير حوالي 8 مليون اسرة، والقطاع بتاع التعليم في كليات الزراعة تطلع ناس علشان يشتغلوا والمدارس الزراعية تشتغل برضو، ولكن انا اتخضيت لما لقيتك بتتكلم في ارقام قليلة".