«لو جوزك فريقه خسر متبقيش انتي والزمن واصحابه عليه».. ياسمين عز تقدم نصائح للسيدات قبل مباراة الأهلي والزمالك

الموجز  

علّقت الإعلامية ياسمين عز على مباراة القمة 125، والتي ستجمع بين الأهلي والزمالك في الدوري المصري تاممتاز، على ستاد القاهرة الدولي مساء اليوم السبت.

وقالت ياسمين عز، خلال تقديم برنامجها "كلام الناس" الذي يعرض عبر فضائية "إم بي سي مصر" مساء الجمعة،: "الماتشات اللي من النوع ده بيكون لها طقوس خاصة في البيت، الأجواء بتكون مكهربة، لو اتصلتي بخطيبك ومردش عليكي، متزعليش منه، لأنه بيكون في دنيا غير الدنيا".

وأضافت الإعلامية: "لو جوزك معرفش ينام النهارده وسرحان، ما تستغربيش مش عشان عنده أرق أو بيفكر في واحدة غيرك، وهو بيفكر في نتيجة ماتش بكره وبيسأل نفسه أسئلة كتيرة، زي يا ترى كهربا هيبدأ أساسي بكرة ولا لأ؟ جدو فيريرا هيبدأ بـ عبدالشافي ولا عمر جابر ناحية الشمال؟ محمد شريف هيرجع مخيف ولا لسه مش في الفورمة؟ هل سامسون ممكن تكون بدايته الحقيقية في الماتش ده ولا هيحصّل زكريا الوردي، وقائمة من الأسئلة الكتيرة، أنتي لا تعلمي شيء عن الصراع اللي في دماغه".

وتابعت: "من فضلك حاولي تتفادي جوزك خلال اليومين دول، وبلاش تصدري له مشاكل أو تطلبي منه طلبات ملهاش لازمة اليومين دول بالذات، ولو فريقه خسر، متبقيش إنتي والزمن وأصحابه اللي بيحفلوا عليه، اوعى تقربي منه على الأقل 3 أيام، ولو فريقه كسب، يا سعدك يا هناكي هتلاقيه اتحول للعفريت اللي في مصباح علاء الدين، اطلبي واتمني زي ما انتي عايزه".