لم يتم ذكره في مسلسل الاختيار .. عمرو أديب يوجه رسالة لـ محمود بدر: «يكفيك إلقاء كلمة الشباب في ثورة 30 يونيو»

الموجز   

وجه الإعلامي عمرو أديب رسالة إلى النائب محمود بدر مؤسس حركة تمرد.

وقال أديب، خلال تقديم برنامجه "الحكاية" المذاع عبر فضائية "إم بي سي مصر 2" مساء السبت، إن محمود بدر كان أحد أَضلع حركة تمرد، والتي أطاحت بحكم الرئيس المعزول محمد مرسي، مضيفًا: "بدر ورفاقه دول كانوا حاطين رقبتهم على ايدهم لأنه كان ممكن في أي لحظة يتقطع، وكانوا بيدوروا عليه في الشوارع".

وأوضح الإعلامي: "أنا مش بكبر ولا بصغر، ولكن دي حاجه حصلت وعارفين اللي تمرد عملته والاستمارات وتحديد موعد الثورة والمجهود الذي بُذل، ولكن مجهود محمود بدر والشباب مجهود تاريخي"، متابعًا: "محمود زعلان إنه لم يتم ذكره في مسلسل الاختيار3، والذي يعرض في رمضان الحالي، وله حق في ذلك، لكن دا شيء أكيد مش مقصود وجايز يجي في الحلقات بعد ذلك، ولكنه يكفيه أنه ألقى كلمة الشباب وتمرد عندما قامت ثورة 30 يونيو، وهو شيء مسجل لا يحتاج لمسلسل أو عمل درامي".

وأكد: "تمرد هنفضل كلنا فاكرينها وفاكرين دورها، ووقتها لما عرضت عليها الاستمارة مضيتها على الهواء، وجالنا تبرعات بفلوس عشان نقدر ندعم تمرد، فهي كانت ضلع أساسي ورئيسي في ثورة 30 يونيو ولا أحد يستطيع أن ينساها، والتاريخ هيفضل تاريخ".

ووجه عمرو أديب رسالة لمحمود بدر، قائلًا: "إنت في مكان جيد في التاريخ المصري المعاصر"، متابعاً: "استضفنا محمود بدر في وقت صعب يدخل فيه مدينة الإنتاج، ولو كان حصل أي حاجة غلط في ثورة 30 يونيو وفي 10 أسماء هيتلموا كان منهم محمود بدر".

وتابع: "أنا ومحمود بدر مش أصحاب ومعيش نمرة تليفونه ولكني بقول حاجة، التار الإخواني معاه كبير وبدأوا يسخنوا عليه في اليومين اللي فاتوا ويقولوا له أشرب، ولكن اللي بيقوم بدور وطني لا يحتاج مقابل ومفيش حد بيستنى دا، ومحمود بقاله سنين بيخدم بلده ودلوقتي عضو مجلس نواب بيخدم الدائرة بتاعته وبلده".

وواصل الإعلامي: "أظن أن مسلسل عظيم مثل الاختيار 3، يكون فيه كم من التفاصيل اللي تخلي من الوارد جدًا إن في تفاصيل تانية متظهرش"، موضحًا: "عايزين 10 مسلسلات زي الاختيار دا عشان نقول على التفاصيل، وفي ناس تانية عملت أدوار أكبر وأهم ولو هنتكلم مش هتصدقوا ولا يعرف عنهم أحد شيء".

وأكمل عمرو أديب: "يهمني بجد أن اللي حصل دا يجيب نتيجة لمستقبل جيد ودا اللي بقوله دائمًا لأن نجاح 30 يونيو ليس نجاح بخروج الإخوان ولكنه يوم لخروج الجهل ونجاح خروج الفقر وانتهاء الوصاية الدينية ولذلك فأن 30 يونيو مش يوم ولكنه مستمر لسنين معانا وإن شاء الله يتم تحقيق كل أهداف الثورة"