«كلام المندوب الروسي ينقط».. عمرو أديب يعلّق على جلسة مجلس الأمن بشأن سد النهضة: انتصار للسياسة المصرية.. وكل حلول الأزمة مُرة

الموجز  

علّق الإعلامي عمرو أديب على جلسة مجلس الأمن الدولي التي عقدت أمس الخميس لمناقشة أزمة سد النهضة الإثيوبي، بناء على طلب من مصر والسودان.

وقال أديب، خلال تقديم برنامجه "الحكاية" المذاع على فضائية "إم بي سي مصر" مساء الجمعة، إن خطاب وزير الخارجية المصري سامح شكرى في جلسة مجلس الأمن بشأن سد النهضة كان قوياً، مشيراً إلى أن مصر نجحت بنسبة 99.9% في أن تنقل أزمة سد النهضة من المسرح الإفريقي إلى المسرح الدولي.

وأضاف أديب: "سامح شكرى بيقولهم أنا جاى المرة دى أقول اللى حصل، المرة الجاية محدش يقولى هو جرا ليه، وإحنا فى مصر والسودان وكمواطنين بالنسبة للقضية دى، درجة حرارتنا عالية أوى، لكن العالم درجة حرارته 30 فهرنهيت، العالم بيكلمنا كأن المشكلة دى حصلت أول امبارح، بيقولوا اتفاوضوا واتكلموا، لأ أنا جايلك لأعلى مراحل الدبلوماسية فى العالم علشان اشتكي".

وتابع الإعلامي: "الناس فى الدول دى مش حاسة أوى بالأزمة، مندوب أثيوبيا كان بيستعبط، بيعتذر لأعضاء المجلس وبيقولهم احنا جينا عشان متفقين، وآبى أحمد يقولك مفيش خطر على المصريين والسودانيين من الملء، طب ما تيجى نكتب، يقولك لأ، إمبارح هما بيكلموا العالم بيقولك مصر التى لا تشبع، بيوصل للعالم صورة غلط".

وأكد: "مصر عرفت إمبارح موقف دول العالم من سد النهضة، دول العالم في المرحلة القرمزية ولكن مصر أصبحت في المرحلة الحمراء”.

وأشار أديب إلى أن كل حلول أزمة سد النهضة مُرة، معلقًا: “ومش أنا إللي بقول كده، إحنا بنجيب الأخبار بالبيانات والمستندات، وده مش كلام فارغ “.

وأكمل أديب: "بعد كام يوم، لو تم تبنى القرار التونسى، أو يطلع بيان رئاسة، فى الحالتين أن قصاد الرجوع لمفاوضات لمدة 6 أشهر، والمندوب الروسى كمان امبارح كلامه كان ينقط، بيقولك محدش يهدد، والكلام كله يكون فى إطار المفاوضات، وفى الوقت نفسه تلاقيهم قالبين الدنيا على تيجراى وأفغانستان، العالم لا يتلفت إلا للمصائب، هما مش شايفين المصيبة بتاعتنا".

واستطرد: "الدول اللى اتكلمت في الأزمة وكأنها أزمة حدثت أول أمس ويتحدثون علي الانخراط في المفاوضات والعودة للاتحاد الأفريقي، دون أن يتحدثوا عن فشل مفاوضات دامت 10 سنوات دون جدوى، فنكتشف أن الناس في الدول دي لسه مش حاسة أوي بأزمة سد النهضة".

وقال أديب: "العالم لا يلتفت إلا للمصائب ولسه مش شايفين مصيبة سد النهضة أوي، ولكن أؤكد كل حلول أزمة سد النهضة مُرة، وقد تكون هناك آلية جديدة لعودة المفاوضات حول السد، واللي حصل امبارح في مجلس الأمن انتصار للدبلوماسية المصرية وقضية مصر".