الفنانة روجينا تبكي على الهواء أثناء حديثها عن مرض زوجها
الموجز
دخلت الفنانة روجينا، في حالة من البكاء، عند سؤالها عن فترة مرض زوجها الفنان أشرف زكي.
وخلال حوارها ببرنامج "أنا والقناع" الذي تقدمه الإعلامية منى عبدالوهاب على فضائية "الحياة" مساء الثلاثاء، قالت روجينا: "دي كانت فترة صعبة أوي في حياتي أنا وأشرف وبناتي، كنت بلبس فيها قناع الراجل المتحمل المسؤولية، لأني فجأة تلاقي الراجل اللي عايشه معاه سندك في مشكلة كبيرة".
وأضافت الفنانة: "لقيت نفسي في دقائق لازم نخش نعمل عملية، ولازم أكون الراجل والست في الوقت دا، وأشرف كان رافض وجود أي شخص جنبه، وأنا المتحملة المسؤولية، وحسيت إني مش لازم أكون ضعيفة، ولازم أكون زيه، فكنت لابسة قناع أشرف في الفترة دي، وإني لازم أكون هو في الفترة دي".
وواصلت: "أنا حسيت في وقتها أحاسيس كانت بالنسبة لي صعبة أوي، وكنت حاسة وهو داخل أوضة العمليات، أنهم بياخدوا قلبي مني من غير ما يقولولي إحنا هناخده، ومفيش حد غيري أنا وبنته والموضوع كان كبير أوي علينا وبسرعة، صحينا من النوم يلا هنروح مستشفى هنعمل عملية كبيرة، وأنا طول عمري عندي قناعات رافضة أن أشرف يتألم، الراجل اللي دائمًا يروح المستشفى للناس ويقف جنبهم دا ربنا هيخليه كده عشان بيعمل كده وعشانا".
وأكدت روجينا: "كانت فترة صعبة جدًا وكان لازم أكون راجل وأكون أشرف زكي، وانا مرجعتش بعد الفترة دي زي منا وعلى طول بقيت متوترة وخايفة عليه، وعلى طول بقيت تحت رجليه، لأنه مهما يزعق أو يتخانق أعمل اللي أنت عايزه، لأن إحساس انك تفكري إن في حد معاكي شايلك وساندك وساند الدنيا كلها، فدا يجراله حاجه فدا شيء صعب أوي".
ودخلت روجينا في نوبة بكاء شديد، اضطرت بسببها منى عبد الوهاب للقيام والذهاب لها وكسر شكل البرنامج لاحتضانها، في لقطة إنسانية.