مش معقولة نطلع بتوع داعش بيشربوا خمرة.. عبير الشرقاوي تهاجم ’’بطلوع الروح‘‘.. ورد شديد اللهجة من عمرو محمود ياسين

كتب: ضياء السقا

هاجمت الفنانة المعتزلة عبير الشرقاوي، مسلسل" بطلوع الروح" بطولة الفنانة إلهام شاهين.

وكتبت عبير الشرقاوي، عبر حسابها الشخصي بموقع "فيسبوك": "أسرة مسلسل الهبل بطلوع الروح.. التناول غبي مش معقولة نطلع الناس بتوع داعش خاينين وبيرتشوا وبيشربوا خمرة.. دول ناس بيعتبروا نفسهم مجاهدين في سبيل الله، ومستعدين للموت في أي لحظة".

وأضافت: "إحنا عارفين إنهم على باطل آه، بس هما مش عارفين هما بيعتبروا نفسهم المسلم الحق، وأي حد جانبهم مسلم ناقص، فمش معقولة نطلعهم بيشربوا خمرة إيه الهبل ده، بقى معقولة البطل إللي بيعتبر نفسه مجاهد عنده غزوة تاني يوم، وممكن يتقتل وهو عارف كده يروح يجيب خمرة ويشرب هو ومراته.. أرحمونا يا هبل.. خسارة الفلوس والله".

من جانبه، رد المؤلف عمرو محمود ياسين على انتقادات وهجوم عبير الشرقاوي على المسلسل.

وكتب عمرو ياسين في تعليقه على منشور عبير الشرقاوي: "اسمح لي اختلف معاكي بنيتي الفكرة على أنه الخمرة حرام في الإسلام فمستحيل الدواعش يشربوا الخمر .. طيب وهو حرق الأسرى مش حرام في الإسلام ؟ هو قتل النفس التي حرم الله قتلها الا بالحق مش حرام بالإسلام؟ هو بالأساس إيه الجرم الأكبر؟ القتل والحرق ولا شرب الخمر؟ ممكن تقولي لي هنا لأ ما هو ده فهمهم الخاطيء الباطل للدين، طيب ليه استبعدتي فهمهم الخاطئ لمسألة شرب الخمر؟ مش يمكن اعتبروا إن الخمر هي ما أخذ من العنب والتمر فقط وماعداه ليس خمرا؟".

وأضاف: "ثم ليه اعتبرتي كل داعشي هو مسلم مؤمن ولكنه فقط فاهم غلط؟ مش يمكن في دواعش بيستفيدوا ماديا ؟ مش جايز بينهم منافقين؟ مش جايز بينهم مضللين وفي حالة المسلسل مش جايز هناك من أفتى له بشربها، إذا كان ذلك سيعيد له زوجته تدريجيا؟ ثم هل هم أنبياء مثلا عشان إنهم مايغلطوش؟ دول مجرمين غلاظ القلوب إزاي تصورتي انه مستحيل يضعف أمام غرائزه وهو بالأصل مسلم نفسه للشيطان بأفعاله دي ناس تقتل الأبرياء نساء وأطفال وعجائز مستبعدة يشرب شوية خمره؟".

وتابع: "المشكلة الكبرى التي واجهت هذا المسلسل أن بعض الناس تتعامل مع داعش على أنهم يمثلون المسلمين! ودي مصيبة في حد ذاتها".

مسلسل "بطلوع الروح" بطولة منة شلبي وإلهام شاهين وأحمد السعدني ومحمد حاتم ودياموند بو عبود وعادل كرم وآخرين، ومن تأليف محمد هشام عبية وإخراج كاملة أبو ذكري، ويُعرض حصرياً على "MBC مصر" في رمضان 2022.