الناقد الفني عبدالله غلوش يعلن عن نجوم النصف الأول من رمضان 2022

أعلن الناقد الفني عبدالله غلوش، عن نجوم الدراما، خلال النصف الأول من شهر رمضان المبارك.

وحدد غلوش عبر حسابه بالفيس بوك، نجوم النصف الأول من رمضان كالتالي:

ياسر جلال

سيبك من نجاحه في تقديم الدور كأفضل ما يكون، لكن اللي عاجبني اكتر هو قبوله للتحدي والمغامرة من البداية .. ودي حاجه ميقدرش عليها غير فنان واثق في امكاناته وقدراته كويس.

محمد سلام

موهبة كوميدية إستثنائية، افيهات بيور غير متوقعه، الرقم الأهم في معادلة الكبير أوي.

رياض الخولي

قبل "جزيرة غمام" قدم في اخر 4 سنين دور العمدة او كبير المنطقة في اكتر من عمل، بس اتحداك لو لمحت فيهم اي مشهد شبه التاني او حسسك للحظة انه بـ يعيد او يكرر نفسه .. ربنا يديك الصحة وتفضل تمتعنا كل سنة بأدائك السهل الجميل.

شريف سلامة ..

أصعب حاجه لما تقدم دور عكس شخصيتك وعكس طبيعتك وعكس اللي الناس اتعودت تشوفه منك ، وهو ما نجح فيه بجداره في مسلسل "فاتن أمل حربي".

الطفلين (محمد العزازي "رحيم في المشوار" ومنذر مهران "سمير في جزيرة غمام") ..

ما شاء الله .. موهبة وحضور وثقة في النفس مش موجوده عند فنانين كبار ليهم مسلسلات بإسمهم.

اسماعيل فرغلي ..

كوميديان من طراز فريد، مفيش مشهد ظهر فيه ومخلكش تضحك من قلبك .. هو أكبر مثال على ان كرم ربنا مهما اتأخر جاي جاي .. حمدالله ع السلامة وواثق ان "مكتوب عليا" هو مجرد بداية لأعمال تانية حلوة تقدر قيمتك وموهبتك.

مدير التصوير مصطفى فهمي ..

البطل الرئيسي لمسلسل SIUTS بالعربي .. صورة في منتهى الشياكة ، تحس انك بتتفرج على مسلسل اجنبي بجد ، صعب جدا لما 90% من المشاهد تكون في لوكيشن واحد ورغم كده يخليك متملش وتحس كل مرة انك بتشوفه بشكل مختلف.

أحمد داش ..

تعرض لانتقادات وتجاوزات تهد جبل بسبب دوره في "نسل الأغراب"، ورغم كده لم يحبط وموقفش مكانه وقعد يعيط ، بل بالعكس نجح في تقديم واحد من أفضل وأهم الأدوار في الموسم الحالي في مسلسل "مين قال".

حنان مطاوع ..

دروس تمثيل مجانية بتقدمها كل يوم من خلال حلقات مسلسل "وجوه .. وعمل بعد التاني بتثبت ان الموهبة وحدها قادرة على نجاح أي تجربة تحت أي ظروف وأي امكانات.

حسين المنباوي ..

بعيدا عن الإيقاع المظبوط والمشدود والكادرات الأشبه بـ لوحات ليوناردو دافنشي، لو معملش أي حاجه في مسلسل "جزيرة الغمام" غير انه اختار احمد امين لتجسيد دور الشيخ عرفات، كفايه بالنسبة لي لإختياره أفضل مخرج هذا الموسم.

محمد سليمان عبدالمالك ..

ان تضيف لقصة أسامة أنور عكاشة، روح وإيقاع وحبكة مسألة مش سهلة غير لو كانت من سيناريست قدير وموهوب مثله.

دنيا سامي ..

واحدة من أهم اكتشافات مسلسل "في بيتنا روبوت" .. طاقة كوميدية هائلة، قادرة ان تستخرج منك الضحكة بأبسط وأسهل الطرق.

رحمة أحمد ..

وجودها على الشاشة لواحده كده من غير حاجه بيشع بهجة وفرح .. مثال يحتذى به في السعي والإجتهاد وإستغلال الفرصة لتقديم أفضل ما لديك وإظهار موهبتك للجميع.

دينا الشربيني ..

قدمت درس مهم أثبتت فيه ان العند والاستمرار في السير بالطريق الخطأ هى من تعيدك للوراء، وليس التخلى عن البطولة المطلقة والموافقة على المشاركة في بطولة مسلسل مهم مع نجم كبير.

ريهام الشنواني ..

واحدة من أهم اكتشافات الدراما في شهر رمضان الحالي .. دور ممكن يبان لك سهل، لكنه صعب جدا ومش أي حد يقدر يعمله ويقدمه بالشكل ده، ويخليه ينور وسط كوكبة من النجوم والممثلين الكبار.

شلة ديدي ..

من الظلم تختار واحده بس من الاربعة عشان تتكلم عليها .. الأربعة أجمل من بعض والأربعة بيكملوا بعض وبينهم كميا غريبة تجبرك على متابعتهم ويخلوك تحس انهم جزء من يومك وعائلتك.

محمد سلامة ..

من اكتر المخرجين تطورا في الفترة الأخيرة .. روحه طاغيه ع اللوكيشن وتقدر تلمسها بوضوح في اداء الممثلين اللي معاه .. كلهم مرتاحين ومبسوطين وبتشوفهم وكأنك أول مرة تشوفهم.

احمد امين ..

مجرد وجوده ع الشاشة بيخليك مبسوط ومبهور في نفس الوقت .. كل مشهد بالنسبة له ماستر سيين ، وفي حالة توحد غريب مع كاركتر الشيخ عرفات.

حمادة هلال ..

ممثل تقيل، قلبه جامد ومبيخافش والأهم من كده انه مش شبه حد وعارف هو بيعمل ايه كويس.. تقريبا هو الممثل الوحيد اللي للسنة التاني على التوالي محافظ على نجاحه وحضوره رغم انه بيقدم نفس الكاركتر.

مي عزالدين ..

عودة حميدة للدراما الرمضانية واختيار ذكي وشكل جديد في الاغراء .. بتقدم دور الست المقهورة اللي بتداري هموما وأزماتها في رقصة او ضحكة .. دور قد يكون الاصعب بين كل الكاركترات الموجوده في مسلسلات رمضان الحالي، ورغم كده عمرها في لحظة ما حسستك بصعوبته.