مادة إدمانية.. ناقد فني يكشف لغز إقبال المشاهدين على برامج رامز جلال رغم انتقادهم لها

كتب: ضياء السقا

كشف الناقد الفني، بهاء حجازي، سر إقبال المشاهدين على مشاهدة برامج مقالب الفنان رامز جلال، رغم انتقادهم الشديد لمحتواها.

وقال حجازي في منشور له على الفيس بوك، أن مشاهدة برامج رامز جلال أصبحت بالنسبة للمشاهد "مادة إدمانية"، أشبه بمادة النيكوتين الموجودة في السجاير، على حد تعبيره.

وشدد الناقد الفني، على أن أغلب مشاهدي برامج رامز ينتقدوها ورغم ذلك يحرصون على متابعتها، لإشباع رغباتهم في مشاهدة النجم وهو يتعذب أو يصرخ من شدة الخوف، الأمر أشبه باستمتاع الجمهور بأفلام الرعب.

وكتب حجازي: "رامز جلال .. إيه الحكاية .. في رمضان 2011 .. بدأ رامز جلال سلسلة مقالبه اللي هو رامز في .. وحط اي حاجة .. رامز بيلعب بالن*ار .. رامز واكل الجو... رامز موفي ستار .. رامز قرش البحر .. رامز عقله طار .. رامز ثعلب الصحراء".

وتابع: "اول نسخة من البرامج دي كانت رامز قلب الاسد .. وفكرة البرنامج بسيطة خالص .. مذيعة اسمها ناتالي بتكلم الضيف وتقوله هنعمل برنامج حواري معاك وهتاخد فلوس .. فالناس فل وماله .. احنا اصلا وقت ثورة ومفيش شغل .. فيلا نروح . يركب الضيف الاسانسير .. فيعطل الاسانسير بيه .. ويفتح في الدور التاني .. يلاقى اسد واقف.. والاسانسير لا بيطلع ولا بينزل .. والكاميرا بترصد خوف الضيف .. ورعبه من الاسد .. خصوصا ان الاسانسير كان بيفتح توماتيكي .. والضيف ببيقى مرعوب قوي".

وأضاف: "ورامز كان بيعلق على خوف الضيف بافيهات غاية في السخف .. غالبا هي تن*مر على الضيف سواء بالتر*يقة على جسمه او على اعماله او حتى على خوفه .. وبعد كدا بيستضيف رامز الضيف ويساله اسالة سطحية ومش مهم اجابة الضيف لانه في الغالب كان بيقطعها..
البرنامج بدأ على قناة الحياة.. واستمرت اللع*نة .. كل البرامج بقت كالتالي .. تعليقات رامز .. المقلب .. تدخل رامز .. وشكرا .. فيه برامج كانت كربونة .. لحد ما راح ام بي سي ... فالميزانية اتضربت في عشرة .. والمشاهدات اتضربت في عشرين .. ووصل للجمهور الخليجي .. فيه ضيوف استضافهم رامز  في 5 برامج واكتر زي مثلا فيفي عبده ومها احمد وعصام كاريكا.. فيه حلقات عملت مشاكل زي حلقة اثار الحكيم اللي متذاعتش ورفعت هي قضية عليه وقالتله كان بيبص على رجلي تحت الميا يا سيادة القاضي.. وهو في المحكمة طلع فيديو لاثار وهي مش معترضة على المقلب بل بتتفاوض معاه على فلوس اكتر".

وواصل: "وحلقة هيفاء وهبي اللي رفضت المقلب فصور حلقة تانية في الفندق وهو بيستعطفها بكل طرق التذلل وحلقة حرفيا مثيرة للغثيان.. وحلقة الاعلامية الكويتية حليمة بولند في رامز واكل الجو لانها كانت حامل وبطنها قدامها قد كدا .. والحلقة سخيفة جدا ومتحاولش تشوفها احسن.. كمان فيه حلقة الفنانة نبيلة عبيد في رامز مجنون رسمي .. لان المفروض الضيف يكون لابس بنطلون .. فنبيلة جاتلهم بـ جيب ومش لابسة بنطلون .. فهو جاب فوطة وغطي رجليها وكانه هيحلقلها مش هيعمل فيها مقلب وكان ناقص يقولها شعر ولا دقن.. ونبيلة عبيد كان ممكن تم*وت عادي في البرنامج".

وأكمل: "هو فكرة انك تشوف الرعب ... دا شيء نفسي في الانسان ودا بيخلي ناس كتير تشوف افلام الرعب .. لان رؤية الفزع بيعمل حاجة نفسية مهمة عند الانسان .. هو انه بيحب يجرب احاسيس جديدة  .. او يختبر نفسه هيعمل ايه في احاسيس الرعب .. كمان افلام الر*عب او المقالب دي بتغذي شعور مهم عند الانسان هو شعور الفضول وتجربة المشاعر دي .. زي اللي بيروح ينط بمظلة من طيارة .. وبيختبر قدرته على تحمل التجربة دي او زي اللي بيشوف فيلم سو .. ومشاهد مقززة وبيبقى مبسوط .. او زي اللي بيتلذذ وهو بيشوف مشهد مرعب.. برامج المقالب دي .. بتعمل حاجتين اولا بتوريك الوش التاني للنجم بتاعك .. بدل ما هو هاي وباي . تلاقيه بيصرخ او بيشتم او بيس*ب او بتبقى الحلقة بتاعته كلها تيت .. فبقيت مبتستناش المقلب قد ما تستني رد فعل الضيف عليه .. كمان دا بيديك شعور بالرضا انك تشوف شخص مش بتحبه وهو بيتبهدل .. شيء سا*دي كدا".

وأوضح: "عموما يعني النوع دا من البرامج بيلعب على غرائز دفينة جوا المتفرج .. بتخليه حتى لو مش راضي على المقلب بيشعر بالرضا عنه وبيتفرج عليه كل يوم كمادة ادمانية اشبه بمادة النيكوتين اللي في السجاير .. فتلاقى نفس الناس اللي بتشتم رامز واخلاقه .. هي نفسها الناس اللي بتتفرج عليه .. طبعا فيه ناس مش بتتفرج عليه وانا منهم .. بس دا لا ينفي ان نسبة كبيرة جدا من اللي بيتفرجوا عليه مش بيحبوه".

واختتم حديثه قائلا: "والمنتج بيدفع وهو عارف ان ام بي سي هتشتري حصري وهتديله فلوسه وزيادة.. وام بي سي هتشتري وهي عارفة ان البرنامج اعلى نسبة مشاهدة .. والمعلن بيعلن ويدفع لانه عارف ان كل الناس بتتفرج .. والضيوف بيقبلوا يذيعوا حلقاتهم لانهم بيقفشوا وبياخدوا شهرة وترند .. وكله بيكسب ويتراضي .. فليه نوقف .. فالموضوع هيفضل مستمر .. لحد ما رامز نفسه يزهق ويبطل يوقف... ورامز مش هيبطل لانه بياخد فلوس حلوة قوي .. وبيعمل نجومية في الخليج وفيلمه اللي بيتعرض هناك بيعمل احلى فلوس".