«لو الموضوع فلوس كنت عملت ملايين».. الداعية أمير منير يحذف بوست «عمرة البدل»

الموجز  

رد الداعية أمير منير، على الهجوم الذي تعرض له خلال الساعات القليلة الماضية عبر مواقع التواصل الاجتماعي، بعدما أعلن عن "عمرة البدل"، وذلك عن طريق تطبيق يسمى تطبيق عمرة البدل نظير مبلغ 4000 جنيه.

وعبر صفحته الخاصة بموقع "فيس بوك"، قال أمير منير: "تعرف إن لو الموضوع فلوس كنت عملت ملايين النهارده بس من قبول اللقاءات التليفزيونية والمواقع والجرائد ونقلت في فيلا النهارده، وبشكرك على الترند وأنا هناك، مضيفا: تعرف إن لو الموضوع فلوس كنت فتحت إعلانات يوتيوب وفيسبوك اللي أنا قافلها جابتلي آلاف الدولارات من المشاهدات بس من غير ما أوجع دماغي، بس كان ومازال رأيي إنها حرام مع كامل احترامي وتقديري لعلمائنا اللي شايفين مفيهاش مشكلة."

وأضاف أمير منير، وفقا لما نقله موقع "القاهرة 24"،: "طب ما اللي هيعملها كده هيعملها للفلوس مش لله يبقى مش هتوصل للي وكله بيها؟، ليه الدخول في نوايا البشر وكأن الكل شياطين؟، ولكن هفترض معاك ده طالما أحرم بالعمرة عن الشخص اللي وكله بيها وقام بها على وجهها يصل ثواب الفعل إلى من وكله، ثواب من قام بالفعل نفسه، اللي أنت وكلته، هو اللي هيتأثر بنيته فلو كانت نيته لله حاز الأجر أما لو كانت نيته غير ذلك فليس له شيء، يعني اللي وكل حد بالعمرة عن ميت أو مريض او متوفى، الثواب يصله بغض النظر عن صدق نية اللي وكله بيها، مؤدي العمرة، ولكن زي ما قولنا نجتهد في اختيار الصالحين اللي عندهم علم. "

وتابع: "أيوه أنت بتدافع عن الأبلكيشن بتاعك عشان بتكسب منه؟، من العجب إن الناس اتهمت بغير دليل، والله الأبلكيشن لا بتاعي ولا باخد منه نسبة ولا لي علاقة أكثر من أني لقيته يسهل على المسلمين شيء من أمر دينهم فحبيت أوصله ليكم."

وأكمل منير: "طب مفيش بقى عمرة بالميتافيرس ولا على زووم؟، لا يجوز والله ولو حد قادر يبقى عليه يقوم بالعبادة على وجهها بنفسه لإنه لا متوفى ولا عاجز ولا مريض لا يرجى برؤه، مردفا: طب ومفيش أبلكيشن علينا يصلي ويصوم عني؟، فيه عبادات الفقهاء أجازوا فيها الإنابة زي الأضحية زي الزكاة زي العمرة والحج وغيرها مما أجازه الفقهاء، وفيه عبادات لا يجوز فيها الإنابة زي الصلاة والصوم (عارف إن السؤال سف لكن قولت نستفيد)."

وتعليقا على ارتفاع سعر الأبلكيشن عما أعلن عنه، قال أمير منير: "ما أنا قولت في الكومنت اللي اتريقتوا عليه الله يسامحكم، غيروا السعر للمصري في الإعدادات عشان تشوفوا أسعار مصر، ليه بقى؟ لأني لما جربت الخدمة وحسيت فيها خير للناس لقيت أسعارها بالريال كبيرة علينا فكلمت الناس إنهم لو هينزلوا الخدمة لمصر لازم ينزلوها أرخص واستجابوا بالفعل وعملوا الخدمة لمصر بسعر أرخص وقالوا لي -وأنا افتكرت إنها حاجة هتفرح الناس برضه- هنعمل لك خصم بكود مخصوص يخليها ارخص كمان، فوصل الموضوع إنه بقى بـ3600 تقريبا يعني 360 ريال واللي في السعودية عارف إن المبلغ ده بعد مصاريف العمرة والتوزيع بين الأبلكيشن لإنه المنظم للأمر وبين مقدم الخدمة مش مبلغ كبير هناك."

أمير منير يحذف بوست عمرة البدل

ولاحقا، حذف الداعية أمير منير، مقطع الفيديو الذي أثار جدلًا واسعًا عبر مواقع التواصل الاجتماعي، والذي أعلن خلاله عن عمرة البدل، وذلك عن طريق تطبيق يسمى تطبيق عمرة البدل نظير مبلغ 4000 جنيه.

وكتب منير منشورا عبر حسابه الخاص بموقع "فيس بوك" قال فيه:

"كام نقطة أخيرة بقى:

1- أنا حذفت الفيديو بالفعل استجابة للشركة السعودية صاحبة التطبيق اللي تواصلت معايا وطلبت مني ده خوفا منهم عليّ جزاهم الله خيرا مش عشان لا فلان هاجم ولا علان قال كل ده والله ولا فارق معايا لا طلبت رضاهم أولا ولا هطلبه في يوم من الأيام، إنما أطلب رضا ربي، وبرضه شيلته كرامة لمن يحبني وساءه الفيديو اختلافا ما بيننا في وجهة النظر أو فهمه غلط وإثباتا للنوايا الحسنة.

2- ممكن نحسن الظن ببعض ونبطل ندخل في نوايا لا يعلمها إلا الله.

3- لو هترفض شيء خصوصا لو ديني أبحث وراه الأول يمكن وجهة نظرك تطلع غلط -والإنسان عدو ما يجهل- وساعتها ممكن تقع في محظور شرعي بالسف على شيء ديني.

4- بلاش نهدم كل حد بيكلمنا في الدين وننتظر لكل واحد فيهم أول غلطة عشان نتهمه في دينه لإنه لو كل حد غلط هدمناه مش هنلاقي حد؛ لإن العصمة انتهت مع موت النبي صلى الله عليه وسلم وكلنا خطاء.

5- ألم الضربة بيبقى أعظم لما ييجي من أخوك فبلاش أهل الدين ومحبي الدين يبقوا أول واحد يطعن أخيه ويظن فيه السوء، سيبنا إيه لكارهي الدين.

6- لو حد في يوم سمعت منه طيب ثم اتهموه في دينه افتكر له الخير اللي له عندك وادع له بالهداية قبل ما تشاركهم وادي له فرصة يتراجع ويعتذر مش لازم دايما تحسسه إنه تحت السكينة.

7- وأخيرا جايز أكون فعلا غلط ما أنا بشر خطاء ولو كده فأسأل الله أن يغفر لي خطأي وأن يصلحني ويحسن نيتي وأنا مسامح والله كل من طلب مني السماح ولو بينه وبين نفسه من غير ما يوصلي، مسامحك يا سيدي، أنا بحبكم في الله."