«حافظ الطريق يا فندم وقادر أفتحه».. اللواء سمير فرج يروي موقفاً للرئيس السيسي عندما كان ملازم أول بالجيش.. وهذا ما كتبه في تقريره السري

الموجز  

تحدث اللواء سمير فرج، مدير الشئون المعنوية الأسبق، عن أسباب منحه درجة الامتياز للرئيس عبدالفتاح السيسي عندما كان قائدًا لكتيبته.

وقال سمير فرج، خلال فعاليات الندوة التثقيفية بمناسبة الذكرى الـ 48 لإنتصارات أكتوبر، اليوم الأربعاء،: "عمري ما ذكرت هذا الموضوع ومش هتكلم عليه حتي لو وسائل الإعلام هتكلمني.. وأما روحت الكتيبة كنت الملازم أول عبد الفتاح السيسي ضابط سلاح الكتيبة وقعدنا سنة ونصف مع بعض".

وأضاف فرج: "يوم ماسيبت الكتيبة أنا كتبت التقرير السرى.. والكتيبة 34 أربعة بياخدوا تقدير إمتياز ، والملازم أول الوحيد الذى أخد تقرير سري إمتياز هو الملازم أول الرئيس عبد الفتاح السيسي".

وتابع اللواء: "مش بقول كده علشان حضرتك موجود.. وكنا طول النهار فى المواقع فى سيناء وكان فيه عاصفة رملية بالليل والطريق أتردم وبلغنا قيادة اللواء وبعتتلنا بندوزر وكان فيه موانع ألغام.. ف الملازم أول عبد الفتاح السيسي قال المدنيين هيعدوا الصبح ولازم الطريق يبقي مفتوح.. قولتله الألغام دي لو اتدمرت هنبقي مش تمام.. قالي انا قادر ونزل بالفعل وفتح الطريق".

وقال مدير الشئون المعنوية الأسبق: "الدليل أنه كان ضابط صاحب قرار هي عندما كلم الشئون الإجارية للكتيبة وطلب عدس لأن الدنيا ساقعة والناس عايزة تاكل حاجة دافية وعربية المياه تطلع وطلب عربية الإجازات وجه وقالي تمام وفتحت الطريق وعساكر الكتيبة فطرت والإجازات طلعوا مطرحهم".

وتابع: "الرئيس السيسي اقترح استبدال الفول والبيض في الإفطار بعدس لتدفئة الموجودين في فصل الشتاء والجبنة البيضاء بالنستو لتكون أسهل في التوزيع".

ويشهد الرئيس عبدالفتاح السيسي اليوم الأربعاء فعاليات الندوة التثقيفية للقوات المسلحة الرابعة والثلاثين بعنوان «أكتوبر ٧٣ والعبور إلى المستقبل»  بمناسبة احتفالات القوات المسلحة بنصر أكتوبر المجيد.