«كانت مستميتة على التريند».. ميار الببلاوي: غلطت لما طلعت مع بسمة وهبة في البرنامج

الموجز    

وجهت الفنانة المعتزلة ميار الببلاوي رسالة لمتابعيها، وكل من وصف ظهورها في برنامج "العرافة" الذي عُرض في رمضان 2024، بـ"الغلطة".

وعبر حسابها الخاص بموقع "فيس بوك"، كتبت ميار منشورا قالت فيه: "كل الناس عمالة تقولى غلطك طلعتي فى برنامج بسمة، طيب أقسم بالله ما كنت أعرف إنها هتكون هجومية كده، اتلجمت مكنتش عارفة أرد خالص، وكل اللي كان في دماغي إني ألغي الحلقة".

وأضافت: "ليس كل منطوق مقصود أنا متطلقتش ١١مرة، كان قصدي إن جوزي على طول بيقول عليا الطلاق يا جماعة، دا بتاع البطيخ بيحلف يمين طلاق إن البطيخة حمرا يبقى مراته طالق، الناس ماسكة على كلمة واحدة تستاهلي علشان طلعتي مع بسمة، خلاص ارحموني اعترفت بغلطتي".

وتابعت الفنانة المعتزلة: "بس أنا صاحبتي دعتني لبرنامجها، وأنا بحب بسمة ومن زمان وصورنا قبل رمضان بأسبوعين وأنا أقسم بالله عمري ماشفتش برنامج العرافة دا قبل كدة، غير حلقة شاكوش ومراته، وعارفة بسمة طيبة وبتحبني، فوجئت بالكاركتر اللي كانت متقمصاه في البرنامج، كان كل همي أحافظ على هدوئي واحترامي للمكان وأرد على أي سؤال بصراحة، علشان المصداقية".

وأكملت: "أنا كنت ضيفة في برنامج متشاف مع مذيعة كبيرة على قناتين كبار (النهار والمحور). الفلوس فوالله إني أخدت مبلغ لا يذكر وكنت مصممة أرجعه وألغي الحلقة وأسألوا أستاذ شريف رئيس تحرير البرنامج، أرجوكم كفاية نقد، واللي حصل في الفيديو الناس اللي بتقول تمثيل ربنا يحسسكم بالقهرة وبوجع قلب الشريفة الحرة المتقية".

وواصلت ميار: "أنا غلطت لما قبلت أطلع مع بسمة ويشفع لي جهلي بالبرنامج وطبيعته، وغلطت إنها لما قالتلي ١١مرة مفهمتهاش إنه حلف بالطلاق فوق الـ100 مرة، يعني أبقى مطلقة مية مرة، وبعدين محدش ليه دعوة بحياتي الشخصية، جوزي وابني وجوزي خط أحمر من هنا ورايح".

وأضافت في منشورها: "والناس اللى بتقولي انتي اللي اتكلمتي وقولتي وعاوزين يجرموني، أنا كنت بتسأل وبجاوب مش أنا اللي فتحت أي كلام، وكنت بحاول أتهرب من الإجابة، بس بسمة كانت مستميتة على التريند من كلامي مكانتش مدياني فرصة نهائي غير اللي أتمنتج، أنا كتبت لأني مخنوقة من الكومنتات، وفي النهاية أنا طلعت في برنامج على فضائيات محترمة على قناة كبيرة مش طلعت فى شقة مشبوهة".

وقالت ميار: "تعبت كفاية أستحلفكم بالله متسيبوش اللي عمله واللي قاله الشيخ وتمسكوا في غلطة أنا معترفة بيها، وبحكم شغلي كمذيعة بعرف أسأل كويس بس بجد معنديش ملكة الرد، ومش هقدر أوعدكم إني لو اتطلبت ضيفة في أي برنامج هرفض لأن دا شغلي، بس حياتي الشخصية خط أحمر ودا هيكون شرطي أنا خدت كل الأدوية بس والله من النكد ما قادرة أنام".

واختتمت ميار الببلاوي منشورها مؤكدة أنها بدأت في اتخاذ الإجراءات القانونية، ضد أحد الشيوخ بسبب الفيديو الذي تحدث فيه عنها، موضحة "سمعت أنه مسح الفيديو بس خلاص حفظناه، والمستشار القانوني بدأ شغله وحسبي الله ونعم الوكيل، وبعتذر على عدم الرد على السادة الصحفيين لأن لم يعد لدي ما أقوله والأمر ترك للقانون والقضاء المصري الشامخ وعند الله تجتمع الخصوم".

وكانت الفنانة المعتزلة ميار الببلاوي قد أثارت جدلًا خلال حلقتها ببرنامج "العرافة"، خاصة عند حديثها عن طلاقها ١١ مرة من نفس الزوج وهو المرتبط بها حاليا، ونفت أن تكون العودة بينهما تتم بمحلل، كما تحدثت عن رأيها في ارتداء الفنانات الحجاب وخلعه وعلقت: "اللي تلبس الحجاب وتقلعه مرتدة من وجهة نظري".