«الكفن ملوش جيوب».. شمس توجه رسالة قاسية للوسط الفني
الموجز
كشفت الفنانة شمس عن تفاصيل مقابلتها مع الفنانة والراقصة الاستعراضية دينا، وأحد المنتجين، بعد تعرضها لاكتئاب بسبب عدم عملها.
وخلال حوارها مع الإعلامية مروة صبري ببرنامج "قعدة ستات" المذاع على قناة "القاهرة اليوم"، قالت شمس: "قابلت دينا وقعدت جنبي بتاع ساعتين تلاتة وأدتني طاقة ايجابية للحياة وحب المهنة تاني، قالتلي لازم تخرجي معانا قولتلها انا هخرج معاكي يا دينا عشان الحب باين في عنيكي، هخرج مع الناس اللي احس انهم بيحبوني مش هخرج عشان حد ينافقني أو انافق حد أو اعمل مصلحة من حد أو العكس."
وأضافت الفنانة: "في ناس عايشة الدور ومن ضهرك بتكرهك وبتتكلم عليكي وحش.. كل حاجة بتوصل محدش بيقولك مين بس انتي بتعرفي من الكلام اللي بيترميلك، في ناس بتوصل الكلام، في حد ممكن يقولك رشحتك لدور بس فلانة قالت إن شاء الله، يعني إن فلانة بتكرهك."
ووجهت شمس رسالة قاسية للوسط الفني، قائلة: "عايزة اقول للناس دي كلها أن الكفن ملوش جيوب، وانا مفهمتش الجملة دي غير لما اخواتي ماتوا، لا في كفن هتاخد فيه فلوس ولا شغل، الناس اللي بتكره الناس ومش بتتمنى الخير لبعض."
كما تحدثت شمس عن سبب غيابها عن الفن خلال السنوات الأخيرة الماضية، وعدم مشاركتها في الكثير من الأعمال السينمائية أو الدرامية.
وقالت: "كنت بشتغل مع كبار المخرجين اللي في الوسط ومتربية على ايديهم وهما دلوقتي تلت اربعهم مش موجودين على الساحة اصلا والأدوار اللي بتجيلي ممكن تكون كبيرة بس مش بحجم الأدوار اللي كنت باخدها زمان، بس بتشدني."
وأضافت الفنانة: "وفي نفس الوقت انا مريت بظروف كتير خلتني معنديش طاقة غير لما تكون حاجة حباها اوي حاجة تهزني، أو حاجة مع مخرج انا اشتغلت معاه وعارفة هو هيعرف يطلع من شمس ايه، غير اني اتعرضت للنصب كتير جدا واشتغلت مع ناس مش فاهمة وحاولت اعمل زي ما الناس بتقولي ارجعي وانتشري ف اكدب عليكم لو قولت محاولتش ."
وتابعت شمس: "جالي حالة من الزهق والقرف لأني اتربيت على ايد حسين كمال وجلال الشرقاوي وايناس الدغيدي ويسرا ويحيى الفخراني، مفيش مخرج كبير مشتغلتش معاه ومفيش ممثل مشتغلتش معاه، فمتعودتش على الأسلوب للي احنا ماشيين بيه دلوقتي."