«بعد السب والقذف هيبقى عندها استقرار بعد كدة؟» .. سهير جودة توجه رسالة نارية لـ «شيرين عبد الوهاب»
الموجز
علقت الإعلامية سهير جودة، على عودة الفنانة شيرين عبدالوهاب لحسام حبيب عقب خروجها من المستشفى.
وقالت الإعلامية سهير جودة، في برنامجها «الستات»، عبر فضائية «النهار»: «التايم لاين إمبارح على السوشيال ميديا كله بقى بيتكلم على موضوع شيرين عبدالوهاب وحسام حبيب، الحقيقة كأن مصر خلصت مبقاش فيها أي حدث غير شيرين وحسام، والواحد قاعد يدور في التايم لاين على أي حدث تاني، لأ كان في تركيز على القصة دي، وكان في أكتر من انطباع وأكتر من قناعة، وفي 3 آراء للموضوع ده».
هي هتكتشف الحقيقة مع الوقت
وتابعت الإعلامية سهير جودة : «في مجموعة من الناس كانت شايفة إن شيرين حرة وتعمل اللي هي عايزاه، والمجموعة دي نسبتها مش كبيرة، لكن الفئة الكبيرة هما اللي كانوا متعاطفين مع شيرين زمان ودلوقتي مش متعاطفين معاها وغاضب جدا، وعنده مبررات لهذا الغضب، والرأي التالث بيقول إننا عارفين إن ده قرار غلط وهي هتكتشف الحقيقة مع الوقت، وهنفضل ندعمها في كل الأحوال».
يبقى عندها استقرار بعد كدة؟
وتسائلت الإعلامية سهير جودة : «بغض النظر عن قصة شيرين وحسام، إحنا عايزين نتكلم على أي قصة تبقى خرجت للعلن، هل ينفع إننا نرجع بعد كل التجريح والإهانات، وتبادل السباب، والسب والقذف، هل ينفع الحياة ترجع، أو إن الشخصيات دي يبقى عندها استقرار بعد كدة؟».
الأحكام على الناس غلط جدا
وتابعت الإعلامية سهير جودة : «القصة اللي حصلت دي تخليك ماتحكمش على حد أنت مش فاهم محنته، والموضوع ده فتح أسئلة كتير، وفكرة إطلاق الأحكام على الناس غلط جدا، مينفعش إن إحنا نحكم على حد أساسا، لأننا بنبقى سامعين جزء من الحقيقة، وللحقيقة وجوه كثيرة وإحنا مش عارفين هذا الشخص، وفي فئة تانية الناس اللي هما مروا بنفس التجربة، قادرين يفهموا شيرين وتفهم أي حد بيعمل هذا الخطأ، وأي حد بيتصور إن أمانه في هذا الشكل من الحياة، وفي ستات بتقع أسرى فكرة الأمان، ولو دورنا هنلاقي في شخصية سامة في حياتهم وصلتهم لهذه النتيجة».
فكرة التعافي بتاخد وقت وبتم على مراحل
وعبرت عن رفضها لخروج شيرين من المستشفى وقراراتها السريعة، قائلة: «هل ينفع إن حد بعد فترة قليلة ياخد قرار، يعني فكرة التعافي بتاخد وقت وبتم على مراحل، أي هزة نفسية بتحتاج من 6 شهور لسنة، عشان يقدر يبقى متزن وقادر ياخد قرارات سليمة، وده لأي شخص اتعرض لمحنة مش بنتكلم عن حد مشهور، وفكرة التعافي مهمة جدا عشان أبقى راسخ وعارف أخد قراري، ورسالة للجميع منحكمش على حد، لأن الحكم ده قيد وسجن، ومنطق الصح والغلط ده منطق شخصي».
وأكدت: «مش من حقنا نقيم التجربة ولا هي تعتبر قضية كل الستات ولا من حقنا نحكم على حد، في ناس عدوة نفسها وإن ربنا لما يبقى مدينا الاتزان بنبقى في نعمة كبيرة جدا مش مدركينها، لازم كل إنسان يبص لنفسه وميلتفتش لغيره، إحنا بنتمنى الخير والتعافي لكل الناس، وشيرين ربنا يردها لنفسها ردا جميلا، وربنا يرد الناس كلها لوعيها ويدينا مع المحنة منحة، وده درس للجميع».