فرشتي شقتك ولا لسة .. موقف إنساني للراحل هشام سليم مع الفنانة ثريا إبراهيم

الموجز

روت الفنانة نشوى مصطفى موقفا إنسانيا عن النجم الراحل هشام سليم وذلك عبر صفحتها على موقع فيس بوك .

حيث كتبت نشوى مصطفى في منشورها عبر الفيسبوك أن الراحل حقق أمنية عزيزة للفنانة الراحلة ثريا إبراهيم.

وقالت مصطفي في منشورها: "افتكرت حاجة عن هشام سليم يمكن مش كتير يعرفوها، في يوم راجعة من التصوير، وكان فيه أستاذة ممثلة كبيرة الله يرحمها اسمها ثريا إبراهيم، قالت لي: نشوى معنديش عربية توصليني في طريقك لأقرب مكان أنزل أخد تاكسي، قولت لها تاكسي إزاي هوصل حضرتك لباب البيت، واحنا ماشيين قالت لي عارفة الشقة اللي هتوصليني لها مين جابهالي — سألتها مين؟  قالت لي شيريهان".

واستكملت: حكت لي الراحلة أنها كانت بتشتغل معها بمسرحية شارع محمد علي، وكانت بتيجى كل يوم من طنطا للقاهرة، وترجع تاني لأن بيتها كان هناك ولما شريهان عرفت قالت لها شوفي الشقة اللي تحبيها وأنا هشتريهالك، ولما اشترتها كانت فرحانة أوي، ولما هشام عرف بارك لها وقال لها فرشتيها ولالسه قالت له فرشتها، قال لها كان نفسي افرشهالك قالت له وهي بتهزر طيب ماتعمل حاجة تانية قال لها تحت أمرك — قالت له نفسي أحج — تاني يوم لقت شركة سياحة بتكلمها وبلغتها إن هشام دفع كامل التكلفة وكانت خمسين ألف جنيه وكمان وهي رايحة أعطاها مصروف الرحلة وقال لها إدعي لي —  بس كده — ألف رحمة ونور".