عامل في سوبر ماركت .. تامر حسنى يروى معاناته قبل الشهرة

الموجز

كتب الفنان تامر حسنى على صفحته على موقع فيس بوك كاشفاً عن معاناته قبل الشهر "حبايب قلبي  في حب ربنا و حبكم ان شاء الله كل كام يوم هاجي على بالليل كدا نتناقش في موضوع من خلال مشواري و تجربتي في الحياة، جايز تستفيدوا منه حاجة وجايز يكون في كتير منكوا هيكون كلامي  بمثابة إشارة تشجعهم كانوا مستنيينها.

وتابع “ من خلال خبرتي النجاح بيقوي و يجعل كل من حولك يهتم بك و العكس صحيح و اعني بالنجاح  النجاح الانساني في علاقاتك بربنا و الناس  .. النجاح المهني و تحقيق ذاتك و طموحك و تحديك لكل الصعاب  و تخطيك لكل محنك زي ما عملوا كتير قبلك و ظروفهم كانت اصعب منك و وصلوا لاكبر من احلامهم ”.

وأضاف " امانه عليكم محدش يكتبلي عاش و هو دا  و تقبر قلبي 😀 انا عايز افتح باب نقاش حقيقي يخليكوا تاخدوا  قرارات مهمه في حياتكم او تتشجعوا و تتحمسوا لخطوات ايجابيه .

واختتم تامر "  اتكلموا و قولوا اللي جواكم  تفريغ احاسيسكم هنا و اي اسأله جواكم او اي مواقف او حكايات لما تتقال هنا هتبقى اول خطوه للصح عشان هتتولّد طاقه كبيره للخير شاهد عليها ربنا ف هتكون خير اوي لينا ان شاء الله ".

 عامل بنزينة لسوبر ماركت

وأضاف تامر: "هطلب طلب منكم قبل اي شيء افتكروا معاناتي في بدايتي وظروفي الصعبة من غير أب ومن غير أي فلوس وبنزل أشتغل في الشوارع من عامل بنزينة لسوبر ماركت لفاعل يعني اللي بيبنوا العمارات بطلع طوب وأسمنت عشان أرجع بيتي لأمي الغلبانة بأي خمسة جنيه، بالإضافة لمرتب النادي لما كنت بلعب كوره كان مرتبي 22 جنيه في الشهر منهم بقى تحويشة المية والكهربا وعمليات أخويا عشان كان عيان لفترة كبيرة كنت بعمل المستحيل فعلًا عشان أمي وأخويا وعشان اوصل لهدفي".

وأضاف: "كان جوايا سعي دائم لطريقين الكورة والغناء وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره زي ما انا كان نفسي أبقى لاعب كورة والكورة مش ليا والأندية كلها مشوني رغم تفوقي كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر ولما آمنت بكده فهمت قدام إن ربنا كان شايلي الأحسن ليا بس ساعتها مكنتش فاهم".

وتابع: اإللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايمًا أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني فاوعى تقول تعبت عالفاضي".

وأردف: "بالنسبة للمحبطين هيفضلوا موجودين انت اللي بتسمعلهم وانت اللي بتسمح إنك تتأثر بيهم امنع دا فورًا متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك إنت السبب دايمًا قول يا رب واجتهد وافهم إن الراحة المطلقة في الجنة بس واحنا على الأرض وربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا، متبقاش أكبر عدو لنفسك، إنت السبب، خد قرار صارم فورًا في التغير والنهوض والنجاح، والله هتوصل متسمعش غير لقلبك وسلم قلبك للّي خلقه وتوكل على الله".