وصف موسم عيد الأضحى بتكسير عظام.. ناقد فني يسخر من فيلم تامر حسني.. ويتوقع نجاح "كيرة والجن" وفشل "في القلب"

علق الناقد الفني، بهاء حجازي، على أفلام عيد الأضحى ٢٠٢٢، ووصفها بموسم تكسير العظام، كما توقع نجاحا كبيرا لفيلم كيرة والجن، بطولة كريم عبد العزيز وأحمد عز، كما أعلن توقعاته لترتيب إيرادات الأعمال المتنافسة.

وكتب حجازي على صفحته بالفيس بوك:

السينما في عيد الاضحى

موسم السينما السنة دي موسم تكسير عظام زي ما بيقولوا، تقريبا دا اول موسم سينما كبير من فترة، في الغالب بيبقى عندك فيلم او فيلمين بالكتير بيتنافسوا على الايرادات والباقي ملو كلام... بس الموسم اللي جاي موسم تقيل .. مثلا انت عندك

- كيرة والجن، ودا اكتر فيلم هيحقق ايرادات، رواية شهيرة لاحمد مراد وافضل ما كتب على الاطلاق، مروان حامد وكادراته، بتتناول فترة مهمة في تاريخ مصر تقدر تقول محدش قربلها، فيلم ملحمي والاعلان بتاعه مبشر، ولو دا موسم عيد الفطر كنت هقولك الفيلم هيعدي 100 مليون جنيه، بس اجمالا الفيلم هياكل 50% من كعكة الايرادات.

- بحبك .. تامر حسني ليه قاعدة شعبية بتاعته .. الناس اللي بتروح وراه .. مع اختلافي معاه كمؤلف وان تجربته في فيلم مش انا كمؤؤلف كانت سيئة والفيلم كان من اضعف افلامه من حيث السيناريو، بس هو السنة دي قرر يفاجئنا واخرج الفيلم كمان .. يعني هو مؤلف ومخرج وبطل ومغني وواضع الموسيقى التصويرية للفيلم .. دا ناقص ينتج الفيلم كمان .. ما هو انتجه برضه بس عن طريق شركة أخوه حسام حسني.. وبرغم ان برومو الفيلم فيه تلتين المواعظ والحكم اللي طلعت بيهم البشرية ودي سينما خطابية اتلغت من الاربعينات .. بس تامر هيعمل ايرادات حلوة مش هتقل عن 30 مليون.. (طبعا دا في مصر لان تامر بيوزع حلو قوي في الخليج).

- عمهم .. تحبه تكرهه .. تختلف او تتفق معاه.. بس مخمد امام ورث من ابوه صنعة عمل فيلم يجيب ايرادات .. نص كوميدي اكشن .. طعم الفيلم بنجوم كتير .. يعني تقريبا الناس اللي على افيش فيلم عمهم كل واحد فيهم نجم .. كالعادة كلهم ضيوف شرف .. بس الفيلم هيعمل ايرادات حلوة .. دا مقارنة بايرادات افلام محمد إمام السابقة ..

تسليم أهالي - دنيا سمير غانم مع هشام ماجد .. ثنائي اتشاف في مسلسل بدل الحدوتة 3 وكانوا مهضومين يعني .. ففيلم حلو كوميدي .. وخصوصا انه اخر ظهور للفنانة دلال عبد العزيز .. ودنيا ليها جمهورها اللي بيروح وراها .. دنيا نجمة تقدر تشيل فيلم لوحدها اصلا.. وهي من القلائل اللي يقدروا يعملوا كدا.

ليلة العيد مش عارف اذا كان هينزل ولا لا .. بس دا من الافلام المهمة اللي للاسف مش بتجيب ايرادات .. وبتلم فلوسها بالعافية بالتوزيع .. الفيلم من نوعية افلام اليوم الواحد اللي بتدور في اطار زمني ضيق هو ليلة العيد زيه زي فيلم الفرح مثلا ..

رهان الموسم هو فيلم اسمه في القلب .. دا بطولة نسرين طافش وخالد سليم ومنة فضالي .. وبرافو على اللي اختار الكاست الجميل دا .. الفيلم مش هيحقق 200 الف جنيه لو نزل..

ويبقى الترتيب بتاعنا
- كيرة والجن
- عمهم او بحبك .. تاني وتالت (او العكس).
- تسليم اهالي
- ليلة العيد.
- في القلب..

متحمسين تشوفوا ايه فيهم..

رابط البوست:  https://www.facebook.com/100044470024943/posts/582986979860298/
 

تعليقات القراء