ميار الببلاوي تكشف آخر تطورات حالة نجلها الصحية.. ورسائل «باكية» عن ابنها وأنانية الناس

الموجز  

أعلنت الفنانة المعتزلة ميار الببلاوي عن تعرض ابنها لأزمة صحية وأن حالته حرجة.

وكانت ميار قد كتبت عبر صفحتها الشخصية بموقع "فيس بوك" قائلة: "إيه ده إيه الدنيا دي إيه الناس دي إيه الواحد عايش في كوكب لوحده ملهوش حد ولا يفرق مع حد كلوا يالا نفسي ولو ليه مصلحة يعملك نفسه مروحة ولا ملوش متلزموش".

وأضافت: "دي كلمة ست طيبة لقتني ببكي في المسجد بتاع المقابر وقالتلي دموعك غالية وفريها الجايات كتير والله استغربت كلامها وكأنها بتأهلني للي جاي النهاردة".

وتابعت ميار الببلاوي: "ابني من الصبح بيموت بين إيدي بيرجع وبيتلوي من المغص ودكاتره داخلة ومحاليل وحقن وأدوية وبكرة امتحانه الصبح لأنه في بكالوريوس ودي آخر مادة طبعا كده خلاص مفيش أمل إلا بمعجزة من عند ربنا لإنه رايح راس في راس والسخونية 40 ألاقي حد حقير كلمني وبحكيله إن ابنى تعبان وبيموت من المغص وبيصرخ يطلب الطلب اللي هو عاوزه ويقفل..عاوزه  أقول الله ما يحوج حد لحد بس بعد الضنى مفيش وكده حلو أوي".

وفي تصريحات إعلامية، كشفت ميار الببلاوي عن تطورات الحالة الصحية لنجلها، معلنة أن حالته تزداد سوءًا منذ يومين، ويتابع مع الطبيب في المنزل.

وأوضحت الفنانة المعتزلة أنه تم تشخيص حالة نجلها "بأنه يعاني من جرثومة سيطرت على الأمعاء بشكل كامل؛ وسببت له المزيد من الألم."

وأكدت أنه في المرحلة النهائية من بكالوريوس الاقتصاد والعلوم السياسية، متمنية أن يعبر من هذه المرحلة بأمان.

وأضافت باكية: "الدكاترة قالوا إن عنده جرثومة ماسكه الأمعاء، وألمها صعب، والنهاردة الحمد الله بقى أفضل، وأخذ حقن كتير جدًا، عنده امتحان آخر مادة ليه النهاردة، هو في بكالوريوس اقتصاد وعلوم سياسية، وآخر مادة ملهاش إعادة، ولو بعد الشر حصل حاجة فيه؛ هيعيد السنة عشانها".

وأشارت الفنانة إلى أن حالته غير مستقرة ولم تكن تسمح له بالذهاب لأداء امتحان آخر العام، ولكن أصدقائه كانوا حريصين على الذهاب معه إلى الامتحان.

وأضافت ميار الببلاوي: "تعبي وشقايا 22 سنة، دلوقت مستنية بس تلفون من ابني يقولي إنه حلّ في الامتحان، إن شا الله يجيب مقبول، يعدي بس، ده جايب امتياز في كل المواد اللي عدت، وكان نفسي أفرح النهاردة إن أنا خلصت مشواري التعليمي معاه.. هو مالوش أبّ، محدش ربى ابني معايا".