هجوم حاد من الفنانة حنان شوقي على محمد رمضان: «مش فنان وبيقلد أحمد زكي.. وخليه ينزل يشوف الجمهور بيقول عليه إيه»
الموجز
أكدت الفنانة حنان شوقي، أن الفنان الراحل أحمد زكي "أقوى فنياً وتمثيلياً من الفنان عادل إمام، بينما "الزعيم" يمتلك كاريزما ربانية. قائلة: "لو عمل أي حاجة بتكون حلوة".
وعن الفنانة يسرا، قالت حنان شوقي، خلال لقاءها في برنامج "نص الكلام" المُذاع على شاشة "النهار"، إنها أفضل فنانات جيلها، مضيفة: "يسرا ذكية ومن الستات القوية في الحياة، وبتعرف تعدي حواجز كتيرة في شغلها .. عاملة زي الفرسة التي بتنط وتعدي الحواجز من غير ما تحسب أي حاجة".
وأكدت "شوقي" أن الفنان كريم عبد العزيز هو "نمبر وان" في مصر وليس محمد رمضان، مضيفة: "لما شوفت كريم بيمثل في رمضان، حسيت إن نور الشريف وأحمد زكي ما ماتوش، كريم عبد العزيز بيشيل الوسط الفني على ايديه .. والوسط الفني تقيل بيه".
وعن الفنان محمد رمضان، قال حنان شوقي: "أنا مش بتابع أي حاجة ليه لأنه مش صادق .. وعلى الرغم من إن عنده كاريزما إلا أن هو اللي بيبوظ نفسه .. لأنه طول الوقت بيقلد أحمد زكي حتى في بلعان الريق".
وتابعت: "بكره محمد رمضان لأني مبحبش الإنسان اللي بيجور على انسان آخر .. وياخد بونت على السوشيال ميديا، ويضيع حياة بني آدم تاني .. ده مش اسمه فنان".
واستطردت الفنانة: "لو اتطلب مني اشتغل مع محمد رمضان، مش هشتغل معاه حتى لو إدوني ملايين الملايين .. لأنه هو اللي بيعمل كده في نفسه .. وبيصعب عليا لأن الغرور ساعات مش بيخلي صاحبه يعرف يتحكم فيها بعد كده".
وقالت حنان شوقي: "خليه ينزل يشوف الجمهور بيقول عليه إيه .. خليه يقعد مع ابن الطيار بس"، مضيفة: “أنا بحب محمد رمضان البني آدم .. بس بكره أفعال محمد رمضان”.