بعد أنباء انفصالهما.. سامر أبوطالب: تكرار الغلطات وقِلّة الذّوق بيعلموا القسوَة.. ورنا سماحة ترد: في داهية التريند

كتب: ضياء السقا

رد الملحن سامر أبوطالب، على أنباء انفصاله عن زوجته المطربة رنا سماحة، في رسالة عبر حسابه الرسمي بموقع التواصل الاجتماعي «فيسبوك».

وكتب أبوطالب: «التجاهل وقِلّة التقدير بيعلموا الانسحاب.. تكرار الغلطات وقِلّة الذّوق بيعلموا القسوَة.. كسر الخواطِر ووجع القلُوب بيعلموك تختار نَفْسك وتفضّلها عن الجميِع وتبطل تعمل حساب لأيّ حدّ، مفيش بني آدم خلقهُ ربنا إلَّا وكان لهُ آخر، مهما كان قوي علَى التحمُّل وصبرُه كبير».

وأضاف: «مهما كان ودُود ومُتسامِح، في النهاية لازم هيقف عند حاجات مُحدَّدة؛ لا هيقدر إنّه يعديها، ولا ينفع يتقبلها بأيّ شكلٍ كان.. فَمحدش يَستَهين بالطِّيب الغلبان اللي بيعمل نَفْسه مَش واخد بالُه بمزاجُه لكِن وقت اللُّزوم لا هيعمل حِساب لا لغالي ولا رخِيص وهيكون علَى حقّ، مساءكم شبه نواياكم».

وسبق أن علقت رنا سماحة على نبأ انفصالها عبر فيسبوك، قائلة: «عذرَا أيها الـ trend، فلدي ما هو أغلى من كنوز العالم، اتعلمت في بيت أهلي إن العلاقة بين الراجل والست أمانة مينفعش تطلع بره البيت، خطيبتك مراتك طليقتك أيًا كان، الأمانة دي ولاد الأصول بس اللي بيعرفوا يصونوها وميفشوش أسرارها، ولاد الأصول بس اللي مبيكذبوش ولا بيتدعواعلى بعض بالباطل، ولاد الأصول مبيقذفوش المحصنات كبيرة من الكبائر، ولاد الأصول بس اللي مبيخونوش الأمانة، ولاد الأصول بس مبيفجروش في الخصام، ولاد الأصول مش محتاجين يستعطفوا حد ولا محتاجين يدعوا المثالية بيسيبوا أخلاقهم تتكلم عنهم ومبيتكلموش هم عنها».

وأضافت رنا: «ولاد الأصول مبيلقحوش على بعض مبيجيبوش سيرة بعض غير بالخير، ولاد الأصول بيعاشروا بالمعروف وبيفارقوا بالإحسان، ومبينسوش الفضل بينهم، ده اللي ربنا أمرنا بيه ده اللي أهالينا ربونا عليه ده اللي الإنسانيه بتقوله، أي حاجة غير كده تبقى عدم تربيه.. قلة دين.. انعدام أخلاق، انعدام الاخلاق ده مينفعش نزينه ونقول أوه ترند، في داهية الترند اللي ينسينا أخلاقنا وتربيتنا وأصولنا».

وتابعت المطربة: «الإنسان بيعيش حياته وبيمشي رحلة، مش هيفضل منها غير سيرتك وأعمالك الطيبة وكلمتك اللي بتتصدق بيها، سيبوا الخير وانتوا ماشيين عشان الناس تدعيلكم بدل ما يدعوا عليكم، اجعل من يراك يدعو لمن رباك، بطلب من أي حد هيكلمني عشان يعرف أي تفاصيل تخص حياتي الخاصة يوفر على نفسه وميكلمنيش ميهمنيش السبق الصحفي ولا الشو الإعلامي ولا الأكثر بحثًا غير في شغلي فقط في الخير والفرحة وبس».

واختتمت رنا سماحة رسالتها قائلة: «عاهدت نفسي وأهلي والناس إلى بحبهم إني أكون خير قدوة عاهدت ابني اللي عيني لسه مشافتوش إني أربيه على الأصول والاحترام والرقي عاهدته غني أربيه يبقى راجل في متستنوش مني ما يفعله الأخرون مش عايزة ابقى ترند».

وكانت رنا سماحة، أثارت حالة من الجدل، بعدما قامت بحذف صورها مع زوجها الملحن سامر أبو طالب، من صفحتها الرسمية بموقع إنستجرام، كما قامت بإلغاء متابعته.

وعلى صفحته بموقع إنستجرام، قام "سامر" بحذف الصور التي جمعته بزوجته، ما عدا صورة واحدة جمعتهما قبل زواجهما.

كما لم يعلق سامر على حمل زوجته، ولكنه اكتفى بنشر دعاء عبر خاصية ستوري بحسابه بموقع "إنستجرام"، يقول: "اللهم لك الحمد حتى ترضى".

يأتي ذلك بعد ساعات من استعراض الفنانة حملها الأول من زوجها سامر أبو طالب، وكتبت معلقاً "إحساس كبير.. شعور خطير بحاجة جامدة بتربطنا".

وطلت مرتدية فستان كات قصير باللون السيمون، تميز قصته بأنه ضيق ما يظهر رشاقتها وهي حامل، ونسقت معه سليبر باللون الأبيض، واختارت مكياجاً هادئاً، وكان شعرها مرفوعاً.

واحتفلت رنا سماحة، ديسمبر الماضى، بعقد قرانها وزفافها على الملحن  سامر أبو طالب داخل أحد فنادق القاهرة، وسط عدد كبير من أصدقائها من داخل الوسط الفنى وخارجه.

يذكر أن "رنا" تحضر لحفل غنائي في الزمالك يوم ٧ سبتمبر القادم.