يعني يا تشوفلي شغلانة معاك يا إما أسيحلك وأبهدلك ؟ .. ماجدة خير الله توجه رسالة نارية للفنانة مها أحمد : إنتي مين علشان تتطاولي علي ناس بتنجح وتفشل وتقع وتقوم تاني

الموجز

دخلت الناقدة والكاتبة ، ماجدة خير الله على خط أزمة هجوم مها أحمد على الفنان أحمد السقا والفنان أمير كرارة ، واتهامهما بالتخلي عنها في ظل فترة عدم مشاركتها في أعمال فنية جديدة .

حيث كتبت خير الله على صفحتها على موقع فيس بوك تقول : هو طبيعي ان ممثل او ممثله يطلب من  زميل نجم  أن يرشحه في اي دور من المسلسل اللي هو بيشتغل فيه؟؟ متجاهلا ان فيه حاجه اسمها مخرج وشركة انتاج؟ . 

واستنكرت خير الله الوساطة في الأعمال الفنية قائلة : هما المسؤولين عن تسكين وتوزيع الادوار،ولما مايكونش فيه دور مناسب لهذا الممثل او الممثله العشمانه تشتغل في مسلسل الممثل النجم؟ .

واستهجنت موقف مها احمد وهجومها قائلة : تقوم تسخر منه وتهزأه وتقول عليه ندل!! يعني ياتشوفلي شغلانه معاك، يا اما اسيحلك وابهدلك ؟؟ واتريق عليك؟؟.

وتابعت:  احنا بنهاجم اللي بيشغل مراته، طب ايه اخبار اللي يشغل صحابه حتي لو مش مناسبين ، حد يفهمنا كيف تدار المسائل في الوسط الفني، وسط العجائب والاعاجيب ، والشغل بالواسطه  ورمي الجته؟

تاريخ من النجاح

وعن السقا وكرارة قالت خير الله : احمد السقا، وامير كراره اشتركا في بطوله اكثر مسلسلات هذا العام فشلا، لكن كل منهما يستند الي تاريخ من النجاح التجاري يمتد لعشرين عاما علي الاقل. 

ووجهت رسالة لمها أحمد قائلة : إنتي مين بقي؟؟وقدمتي ايه في حياتك يذكرك الجمهور به ؟علشان تتطاولي علي ناس  بتنجح وتفشل وتقع وتقوم تاني، ولاتتوقف عن الاجتهاد ومحدش منهما دخل هذا المجال بالواسطه ورمي الجته!

كانوا مخدماتية للأستاذة 

بدأت الأزمة بعد شن الفنانة مها أحمد، هجومًا عنيفًا على نجمين كبيرين ظهرا في مسلسل رمضاني، لم تسمهما، وقالت عنهما "كانوا مخدماتية للأستاذة"، وجاء رد والدة الفنان أحمد السقا، والفنان أمير كرارة، ليربط بينهما وبين هذا الهجوم.

كتبت «مها» عبر صفحتها الرسمية بموقع «فيسبوك»: «عوضي على الله دى الجمله اللى دايما بقولها لما اتصدم فاشخاص، الحكايه ياساده نجمين عملوا مسلسل واتنجمت عليهم بنوته لسه الف باء تمثيل واديتهم على قفاهم وركبت عليهم إلى ان اصبحت بطلة المسلسل وبطلة الدعايه للمسلسل وهما راضيين رغم ان طول عمرهم مبيعملوش كده مع أي زميله لهم اقربها انا».

موضحة:«النجم الاولانى بينى وبينه عيش وملح وزماله رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتداءه المفروض انه عارف قيمتى الفنيه وعارف انى اضافه له اتهرب منى وموقفش جنبى وباعنى رغم ان الكل عارف انى زى اخته (ندل)».

واضافت: «اما التانى كان فبداياته يتمنى يسلم عليا ويقولى يااستاذه نزلت من نفسى وقلتله مش هنشتغل مع بعض ماهى الحوجه مره رد وقالى الدور بينادى صاحبه طبعا محكلكوش قد ايه ندمت نفسى وعشت اسود ايام حياتى عياط واكتئاب وقلت عوضى عليك يارب»

واستكملت :«تمر الايام والاتنين يعلو ويتجمعوا مع بعض فمسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه)».

واختتمت :«يمهل ولا يهمل ابدوا من جديد يااوفر تمثيل ياللى مبتقروش ياكمبارس جنب النجمه. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ) .يارب متحوجنا لحد حتى ولو كان اققرب الناس لينا».

تعليقات القراء