عمل مع أحمد زكي ومحمد صبحي.. شادي خفاجة يستغيث: مبمثلش بقالي 10 سنين والمخرجين نسيوني

كتب: ضياء السقا

وجه الفنان الشاب شادي خفاجة، رسالة مؤثرة للجمهور، معبرا خلالها عن حزنه بسبب عدم مشاركته في أي عمل فني منذ 10 سنوات، مؤكدا أنه اتصل ببعض المخرجين ولكنه لم يجد أي اهتمام.

وكتب شادي عبر حسابه بموقع "فيسبوك": "أصدقائي وأخواتي المخرجين ومساعدين الإخراج والإنتاج، أصدقائي الفنانين اخواتي اللي بقوا نجوم ما شاء الله ومبسوط جدا بنجاحهم وتألقهم وفخور بيهم وياما شاركنا بعض اللقمة وشاركنا بعض أحلامنا وأمنياتنا وشفتهم بفضل الله بيحققوا أحلامهم وفخور وفرحان بيهم جدًا لإنهم يستاهلوا ده".

وأضاف: "أخوكم بقاله ١٠ سنين كاملين ماشتغلتش في أي عمل فني تحديدا من ٢٠١١، ولا تم ترشيحي من قِبَّل أي حد من أصدقائي، على الرغم من إني كل سنة اتصل ببعض المخرجين ومساعدين الإخراج أصدقائي اللي على تواصل دائم معاهم علشان أفكرهم بيا وبيكون الرد دايمًا إن أنا ممثل شاطر جدا ومش محتاج تفكرنا بيك احنا فاكرينك ديما بنجيب سيرتك بكل خير بس مافيش حاجة مناسبة ليك".

وتابع: "مع إني ممثل وأقدر أعمل أي دور يطلب مني سواء صعيدي أو مودرن أو كوميدي أو شعبي أو ظابط أو.. إلخ، وبالنسبة لسني مهواش معضلة أنا سني دلوقتي ٣٣ سنة يعني أغلب الممثلين والنجوم حاليا في نفس العمر ده تقريبا".

واستطرد: "أنا مش بلوم حد أنا عارف إنهم بيحبوني وعارف إنهم مش هيتأخروا لو شافوا حاجة مناسبة ليا، بس أنا حبيت أفكركم بيا وأفكر أصحابي اللي بيحبوني وفاكرين ليا حاجة كويسة معاهم زمان".

واختتم حديثه قائلًا: "أغلب المقربين ليا هيتصلوا بيا حالا ويقولولي أمسح البوست ده ومينفعش تكتب كده، بس أنا شايف إني عاوز أكتب ده من زمان ومتأكد إن في ناس صحابي كانوا ناسيني ومحتاجين بس حاجة تفكرهم بيا ويمكن البوست ده لو انتشر ربنا يكرم وألاقي فرصة كويسة ومش عيب أبدا إن الناس تساعد بعض على النجاح والشغل ويبخت من ربنا جعله سبب لتوزيع أرزاق الناس".

جدير بالذكر أن شادي خفاجة بدأ مشواره الفني من عمر الرابعة ومن ثم بدأ الدخول في مجال الفن العربي واشترك شادي في العديد من الأفلام المصرية منها ناصر 56 عام 1992 لأحمد زكي، و فيلم صياد اليمام. وظهر شادي بشكل مكثف على الشاشات الفضية منذ عام 1998 في برنامج عالم سمسم للأطفال على القناة الثانية بالتلفزيون المصري يوميا وأيضا في العديد من المسلسلات العربية ومنها مسلسل أولاد الشوارع عام2006 ومسلسل بنت من الزمن ده عام 2008 ومسلسل الوتر المشدود عام 2009 ومسلسل ملح الأرض لمحمد صبحي، ومسلسل مملكة الجبل عام 2010 ومسلسل بعد الفراق عام 2009 وقام أيضا بالعديد من الأداء الصوتي لأفلام ومسلسلات الكرتون العربية المدبلجة ولدية أخوان هما الممثل هادي خفاجة و الممثل فادي خفاجة.

تعليقات القراء