كيف دعم الفنانون والإعلاميون لينا شاكر بعد إصابتها بالسرطان.. والمذيعة:«ما تخيلتش إنه يكون بدري كده»

الموجز

فور إعلان إصابتها بالسرطان، حرص عدد كبير من نجوم الفن والإعلام على دعم الإعلامية لينا شاكر.

ودعم الإعلامي شريف مدكور الإعلامية لينا شاكر، عبر حسابه بموقع «فيسبوك»، قائلًا «صديقه عمري واختي، واللي كانت جنبي في مرضي كل لحظة من أول العملية لكل جلسات الكيماوي كانت جنبي تقويني، وتقولي حتقوم وحترجع زي الحصان، وبعدي بسنة يجي لها نفس الهدية من ربنا، وكانت في كل لحظة قوية وراضية، مش عارف أكتب إيه ولا إيه، ربنا يتمم الشفاء ليكي ولكل مريض سرطان». حسبما نشر موقع "ألوان- الوطن".

وقام «مدكور» بتغيير صوره بروفايل صفحة «فيسبوك» الخاص به، بصوره لـ«لينا» من أحدث سيشن لها بدون شعر.

أما ريهام عبد الغفور فعلقت قائلة «حبيبة قلبي ألف سلامة عليكي، إن شاء الله شدة وتزول وتبقي زي الفل».

وقالت نجلاء بدر «حبيبتي، بحبك قووووي، إنتي أقوى من أي حاجة، بحبك، شكلك قمر بجد ماشاء الله».

وأضافت الإعلامية إنجي أنور: «ألف سلامة عليكي يا لينا، إنتي واحدة من أجمل وأشيك الناس اللي قابلتهم»

وعلقت راندا البحيري: «ربنا يشفيكي يا لينا، قمر حتي وانت عيانة، ربنا يطمنا عليكي ويديم عليكي روحك الحلوة».

وأصبحت الإعلامية لينا شاكر حديث السوشيال ميديا خلال الساعات القليلة الماضية، فور نشرها صور فوتوغرافية لها بدون شعر، معلنة محاربتها لمرض السرطان منذ عام.

ونشرت «لينا» منذ ساعات أحدث سيشن تصوير لها بدون شعر، وعلقت قائلة «أجريت الفحوصات والتحاليل، واتشخصت وعملت العملية وأخدت الكيماوي، وبعدها الإشعاعي، الحقيقة إن ماخدتش الخبر ده زي بقية الناس، إن صحيح جالي لحظه الانهيار، كانت وانا بعمل الماموجرام، وماكنتش لسه اتشخصت، بس لأني كنت بدعي ربنا إنه ياخذني وانا على رجلي وفي صحتي، وكنت متصورة إنه حيكتبهالي، بس في اللحظة دي زعلت، لأني ابتديت أحس إني أنا داخله على إيه، وفكرني بكل اللي عيشته مع ماما».

وأضافت «الحقيقه إني مش عايزه أعيشه تاني مع أي حد عزيز، أو غالي عليا، وكنت فاكرة إني خلاص أخدت نصيبي من المرض في كل اللي عيشته وشفته مع أمي، بس اتضح إنه كاتب لي غير كده، وأسرع مما كنت أتخيل، أنا كنت بقول أكيد حيجيلي كانسر زي ماما، بس ما تخيلتش إنه يكون بدري كدة، وأنا عندي 43 سنة، واديني عرفت بنفسي الإحساس، ودوقت جلسات الكيماوي والإشعاعي كمان».

واضافت"«أنا كان بقالي سنين كتيرة ما عملتش فوتو سيشن، وقررت إن ده الشكل اللي حعمل بيه الفوتو سيشن دي.. أني أكون من غير شعر، عشان ده حالي، وأفكرني وأقول لكل واحد أو واحدة بيمروا بالتجربة دي، إنتم مش لوحدكم، ملايين بيتعرضوا لها يوميًا، وبجد دي مش آخر الدنيا، صحيح أنا ما قدرتش أنزل أمشي في الشارع كده، بس أنا قادرة اتصور كده، واحطها عندي على الـwall، وما أكونش مكسوفة أو متضايقة وأحطها على كل الـgroups اللي أنا فيها عشان نشجع بعض، أننا ما نزعلش ولا نكسف وأن يجي اليوم اللي نقدر نمشي في الشارع كده، وما نشيلش هم الباروكة ونكون أقوياء وراضيين»

تعليقات القراء