بعد كشفها تفاصيل الحالة الصحية لمحمود ياسين.. شهيرة: ’’مش عايزه أشوف خلقة حد‘‘

كتب: ضياء السقا

عبرت الفنانة شهيرة، زوجة الفنان محمود ياسين، عن حالتها النفسية السيئة، خاصة بعد تفجيرات لبنان، بالإضافة إلى مرض زوجها.

وقالت شهيرة عبر حسابها بالفيس بوك:"مش عارفة ليه بقي عندي بلادة يعني تناحة من ناحية الكل لا قريب ولا صديق ولا بعيد ولا قريب مش عايزه أشوف خلقة حد".

وتابعت الفنانة: "داهية لكون داخلة على حالة نفسية مش عايزة أفسر فى وشكم وأقول اكتئاب يارب لأ لأ استرها معايا يارب يا كريم أستغفر الله العظيم وأعوذ بالله من الشيطان الرجيم، بصوا بقى لا تنزعجوا ممكن موضوع لبنان كمل علينا".

وكانت شهيرة، قد كشفت تفاصيل الوضع الصحي، للفنان محمود ياسين، موضحةً أن حالته مستقرة لكنها لا تتحسن.

وقالت الفنانة، في تصريحات لـ"اليوم السابع" إن زوجها بخير ويتمتع بصحة جيدة و"زى الفل كمان"، على حد وصفها، و"نشكر ربنا على كل حال"، مضيفة:" الحمد لله أن حالته ثابتة على كدة، وما ينشر عن تدهور صحته ما هي إلا شائعات لا أساس لها من الصحة".

وكانت شهيرة قد أكدت خلال مداخلة تلفونية، مع الإعلامي وائل الإبراشي في برنامج "التاسعة": "الحالة مش بتتحسن، ربنا موجود مش عارفة هنعمل إيه، الواحد بيقول يا رب تعدي الأزمة، الموضوع إنه ملوش علاج، ربنا يرفع عنه ويشفيه".

وأضافت شهيرة: "حالته ساعات تبقى إلى حد ما الواحد يتقبلها، وساعات أتهز أوي، ولادي يقولوا لي يا مامي ما إحنا عارفين تطورات الموضوع، عشان أنا ملزماه باستمرار أي تفصيلة ولو صغيرة بتأثر معايا، أنا بس بتمنى من ربنا الحالة متدهورش، لو حتى هتثبت على كده أنا راضية، يعني حتى هقول الحمد لله حسه في الدنيا".

وتابعت شهيرة: "محدش بيدخل عندي نهائي من 5 أشهر، عمرو قالي أنا عايز أشوف أبويا قولتله أنت مخالط، قال ما إحنا لازم نعيش الحياة وموضوع كورونا مطول وناخد بالإجراءات الاحترازية، قولتله أوك مقولتش حاجة بس من بعيد، بخليهم شوفوه وهما لابسين الكمامة من بعيد أوي أوي، رانيا سمحت لها إمبارح تشوفه من بعيد، يعني كانت هي في الجنينة وإحنا في الليفينج جوا".

وأكملت شهيرة: "سألته مرة عن رجاء الجداوي لما ظهرت قدامنا في التلفزيون، قولتله مين دي؟ وقال رجاء الجداوي ففرحت جدا، واتصلت بيها ومن فرحتها بكت".

وكان الفنان محمود ياسين أصيب بالزهايمر منذ فترة، ويعاني مشكلات صحية أخرى أبعدته عن الساحة الفنية منذ سنوات.

يذكر أن آخر عمل قدمه محمود ياسين كان فيلم "جدو حبيبي" الذي شارك في بطولته مع أحمد فهمي وبشرى ولبنى عبدالعزيز، وتم عرضه عام 2012.

تعليقات القراء