’’البسوا المموه بيخافوا منه‘‘.. أحمد عز يداعب الجمهور أمام السيسي.. ويوجه رسالة قوية
كتب: ضياء السقا
داعب الفنان أحمد عز، بطل فيلم الممر، الحضور، خلال كلمته بالندوة التثقيفية الـ 31 للقوات المسلحة، أمام الرئيس السيسي، قائلا: "البسوا المموه بيخافوا منه".
وقال عز: "احنا سعداء جدا إن احنا بنشارك معاكم فى ذكرى انتصارات حرب أكتوبر بفيلم الممر، والنجاح اللى حققه الفيلم رسالة، وهى رسالة الجمهور والشعب اللى شاف الفيلم إللى أكد على حاجة واحدة مهمة إن الشعب المصرى وجيشه كيان واحد مينفصلش".
وأضاف الفنان: "إذا كنا خلصنا جيشنا من بدرى وبنمتهن الآن التمثيل بس كل واحد من الموجودين لو رجع به الوقت والبلد طلبته أنه يلبس اللبس العسكرى تانى هيكون شرف وفخر".
واختتم بطل فيلم الممر، كلمته قائلا: "أيام التصوير تدربنا في معسكرات الصاعقة، والرجالة هناك قاموا معانا بالواجب وزيادة، وهختم بالكلمة التي تثار حاليا على مواقع التواصل لما بنيجي نتكلم عن جيشنا العظيم، وهي البسوا المموه بيخافوا منه".
أحمد عز خلال الندوة التثقيفية بحضور السيسي: "البسوا المموه بيخافوا منه"#ON_E pic.twitter.com/xYVnMrXiCy
— ON E (@ONENT) October 13, 2019
وكان الرئيس السيسي، أبدى إعجابه، بفيلم الممر، الذي تناول بطولات الجيش المصري في حرب الاستنزاف، موجها الشكر لأبطال العمل، مطالبا بتكرار التجربة خلال الفترة المقبلة.
وقال السيسي في الندوة التثقيفية: "بشكر أبطال الفيلم باسمى واسم المصريين وبقولهم إن العمل كان رسالة جميلة جدا، وأداء كل من شارك بالعمل كان يعكس روح مصرية بتتكلم حتى لو كان بيتكلم باسم غير مصري".
وأضاف الرئيس: "إن شاء الله يبقى فيه فيلم تانى وثالث ..محتاجين كثيرا هذه النوعية من الأفلام مستقبلا، خاصة فى ظل اللى بتشفوه والتحديات فى المنطقة ومحاولة سلب وعقول وآمال شعوبنا إنه يكون فيه على الأقل كل 6 شهور فيلم زى كده يفكر الناس ويسعدها".
وتابع: "انتوا عكستم بأدائكم كل شرائح المجتمع المصرى فى الوقت ده، وروح المصريين تجاه بلدهم وصلتوها لينا كلنا، وللشباب اللى مشفش ده وعاشوه، أتصور التأثر الكبير اللى حصل انتوا عيشتوهم الفترة دى".
وواصل: "اللى انتوا بينتوه فى الفيلم كان فعلا كده فيه ناس مستعدة زي الصعيدى اللى كان بيقول أوريهم إن أنا واقف"، ويقصد الرئيس دور العسكري هلال الذي جسده الفنان محمد فراج، مضيفا: "ده رمز لشجاعة المصري إنه لا يتخاذل أمام أي تحدى والرسالة جميلة فعلا".
ووجه الرئيس رسالة للمنتجين، قائلا: "التجربة قابلة للتكرار كثيرا، وشوفتم حالة الالتفاف مش للجيش والشعب بس للدولة كمان حول مصر، محتاجين فى ظل اللى بتشفوه والتحديات فى المنطقة ومحاولة سلب وعقول وآمال شعوبنا إنه يكون فيه أفلام زي كده كل فترة".
وكانت الندوة التثقيفية، قد عرضت مشاهد من فيلم "الممر"، في حضور جميع أبطاله لتكريمهم.
وأشادت الندوة بالفيلم ودوره فى تعريف الأجيال الجديدة، بالدور الذى بذله رجال القوات المسلحة خلال حرب الاستنزاف، وحرب أكتوبر المجيدة.