’’لو محصلش تحسن هيبقى في جراحة‘‘.. أحمد فهمي يكشف تفاصيل الحالة الصحية لهنا الزاهد.. وكلمات مؤثرة للفنانة من على فراش المرض
كتب: ضياء السقا
بعد أيام قليلة من حفل زفافها على الفنان أحمد فهمي، تعرضت الفنانة هنا الزاهد لوعكة صحية حادة، نقلت على إثرها للمستشفى، خلال قضائها شهر العسل برفقة زوجها في سنغافورة.
من جانبه، كشف أحمد فهمي عن تفاصيل الحالة الصحية لهنا الزاهد، وكتب عبر حسابه الشخصي على موقع التواصل الاجتماعي "فيس بوك": "شكرًا لكل الناس اللي بتسأل على هنا ومعلش مش عارف أرد على كل الناس لأني كنت محتاس لوحدي.. الموضوع أننا في المستشفى هنا في سنغافورة وهنقعد تلات أيام تحت الملاحظة ولو محصلش تحسن هيبقى في جراحة".
وتابع: "الموضوع بايخ ومفاجئ بس بشكر دكتور أشرف زكي فعلا.. والدكاترة المصريين اللي متابعين من مصر الحالة مع الدكاترة هنا.. وبشكر معالي السفير محمد أبو الخير اللي واقف معانا جامد هو والمصريين في السفارة.. إن شاء الله خير".
كان فهمي قد نشر عبر حسابه الشخصي بموقع "إنستجرام"، صورة لزوجته من المستشفى.
وعلق الفنان على الصورة قائلا: "عامة، أنا مليش فى الحركات البيئة اللى زى دي خالص، ولا عمري كنت هجيب سيرة ولا أنزل صور زي دي وبقالي شوية بهزر مع صحابي الزملكاوية ع الماتش، بس احنا برا مصر، أنا وهنا وبقالنا يومين بنروح لدكاترة عشان هنا تعبانة، ودلوقتي رحنا لتالت مرة عشان تعبت تاني جدا".
وأضاف فهمي: "بجد فيه ناس مركزة قوي قوي قوي معانا لدرجة إن فيه مهرجان (مش الجونة) كان من كام يوم مبيسألوش أي حد من الزملا عن الجائزة اللي واخدها لا بيسألوهم عننا وعن الفرح وعن تدخلي في شغل هنا، والغريب إن بعض الزملاء خاضوا في حياتنا الشخصية، بجد شكرا جدا لكل الناس اللي فرحانة لنا من قلبها وربنا يديمكم نعمة، أما بجد اللي مركزين أرجوكم الحياة مش ناقصة، إحنا فى شهر العسل وبايتين أهو فى المستشفى".
من جانبها، نشرت هنا الزاهد "دعاء دينياً "، من على فراش المرض، وكتبت عبر صفحتها الشخصية بموقع "إنستجرام": "اللهم اشفني، فأنت القوي، لا شافي سواك. اللهم أنت أعلم بوجعي. ربي اشفني شفاء لا يغادر سقما، عاجلا غير آجل، اللهم اخرج كل سوء ومكروه من جسدي".
يذكر أن أحمد فهمي وهنا الزاهد كانا قد احتفلا منذ أسبوع بحفل زفافهما في أحد فنادق القاهرة، والذي حضره عدد من الفنانين والأصدقاء.
