لما كنا صغيرين .. بقلم «ابن الشافعي»
2015-05-03 09:48
كلمات الشاعر/ محمد الشافعي
لمَّا كُنّا صغيرين .. كُنّا أبسط
كُنّا لسه مبسوطين!
كُنت احبك مش بخاف
قلبي لسَّه ماكانش شاف
كُنّا فعلا طيبين..لما كنا صغيرين
كان ماعنديش شُغل بُكرة
لسَّه طازة كل فكرة
وكل حاجة لسَّه بكر!
كنت ماستحملش اغشِّك
كان مافيش ماكياج ف وشِّك
دنيا ماتمسختش فِكر..!
كُنّا أبسط.. لمّا كُنّا صغيرين..
كان مَدى شوقنا و هدفنا
خدنا بوسة ماحد شافنا!
وإننا نفضل لبعض..
كان مافيش أسهم ف بورصة
كان مافيش ولا قاعدة خرسا
كنا فعلا جوه بعض..
والسنين فاتت سنين
والبيوت مش دفيانين
كل شيء أصبح عبث
و احنا مش متأكدين
إحنا إحنا ولاّ إحنا ..رُحنا .. رُحنا
ولاّ روحنا..
وكل شيء اصبح حزين
كُنّا أبسط..لمّا كُنّا صغيرين..
تعليقات القراء