نص التحقيقات مع فرد أمن الكومباوند: ضربني 12 قلم على وشي وسحلني 3 مرات.. والمتهم: شتمني بأمي

الموجز

جاءت نص تحقيقات وأقوال محمد مصطفى المعروف إعلاميا بواقعة «فرد الأمن كومباوند المقطم»، والمعتدى عليه من «وليد. ع»، أحد سكان الكومباوند بعد تنازل فرد الأمن عن واقعة الصفع والتعدي عليه، أمام هيئة المحكمة بجلسة أمس الخميس، لتحجز المحكمة حكمها في القضية ليوم 19 مايو المقبل، وذلك للاختصاص الرقمي مع استمرار حبس المتهم.

وجاء نص أقوال المجني عليه أمام جهات التحقيق على النحو الآتي:

س: ما معلوماتك بشأن الواقعة لديك؟

اللي حصل وأنا في شغلي كفرد أمن في الفترة المسائية في  كومباوند البارون، لقيت عربيه سوزوكي بيضاء وبداخلها أربع أشخاص، 3 شباب والسائق راجل كبير، بحكم عملي وقفتهم على البوابة رقم خمسه للكومباوند وسألتهم داخلين لمين فقالوا لي ما نعرفش بس إحنا داخلين جوة، قلت لهم طيب اركنوا على جنب وكلمت الساكن عشان أعرف هو مين، وهتدخلوا تعملوا إيه فردوا عليا وقالولي ملكش فيه، رديت عليهم بعد إذنكم كلموا الساكن يعرفكم العمارة كام والشقة كام.

فرد أمن الكومباوند: سحلني على الأرض واتهمني إني شتمته
وتابع: «الراجل الكبير اللي كان سايق اتصل على التليفون وكلم الساكن وقال له يا باشا فرد الأمن مش عاوز يدخلنا وعاوز يعرف إحنا داخلين ليه جوة وهنعمل إيه، بعد كدة الراجل الكبير إداني التليفون وقال لي رد على الساكن فأخذت منه تليفون وبرد على ساكن لقيته بيقول لي يا ابني أنا العميد وليد، وهم داخلين يصلحوا العطل اللي عندي في العربية ودخلهم يلا، بعد كدة قفلت معه وأخذت منه الرخصة وسجلتها في دفتر الأحوال، وبعد ما سجلتها دخلت الأربع أشخاص داخل الكومباوند وبعدها بربع ساعه لقيت العميد وليد جه ومعه الأربع أشخاص دول، وقال لي أنت فرد الأمن اللي على بوابه خمسة قلت له أيوة، لقيته بيبلطج علي وبيتعدى عليا بالضرب بإيده على وشي ورقبتي وسحلني وجرني على الأرض وضرب فيا بإيده وبرجله، فقلت له أنت بتضربني ليه؟.. فقال لي أنت بتشتمني ومش عاوز تدخل الناس اللي جاية ليا، قلت له ما حصلش والله أنا مشتمتكش والناس اللي كانوا داخلين لحضرتك مقالوليش إحنا داخلين ليه، ولقيته بيقول لي اتصل بمدير الأمن».

س/ متي وأين حدث ذلك؟

الكلام ده حصل يوم الخميس 28/04 حوالي الساعه 10:00 مساء امام كومباوند البارود منطقه هضبة لوسطي المقطم

س/ ما سبب تعدي المتهم و. ل عليك تحديدا؟

ج/علشان أنا وقفت أربع أشخاص على البوابة كانوا داخلين له، وقالوا له إن أنا مرضيتش أدخلهم، فجه وتعدى عليا والضرب.

س/ هل كان المتهم يحمل سلاحا وأدوات أثناء الاعتداء؟

ج/ لا

فرد الأمن: مكانش مديني فرصة أستغيث بحد
س/ هل قام أي من الأربع أشخاص المجهولين الذين كانوا رفقة المتهم سالف الذكر بالتعدي عليك وإحداث إصابتك؟

ج/ لا ما تعدوش علي بالضرب بس كانوا بيبلطجوا عليا معه وواقفين حواليه ويمنعوا أي حد يحوش.

س/ كم عدد الضربات التي كالها لك المتهم؟

ج/ هو ضربني اكثر من 12 قلم على وشي بيده وسحلني على الأرض ثلاث مرات.

س/ أين استقرت تلك الضربات؟

ج/ في كوعي الشمال ووشي وركبي الاتنين ورقبتي

س/ هل ثمة استغاثة بدرت منك؟

ج/ لا مكانش مديني فرصة


كما جاءت نص التحقيقات الخاصة بواقعة الاعتداء على محمد مصطفى المعروف إعلاميا بـ«فرد أمن كمباوند» علي يد أحد السكان بسبب عدم دخول أشخاص يعرفهم، وذلك أمام محكمة جنايات جنوب القاهرة المنعقدة في زينهم عن القضية أمس الخميس، وأنكر في أقواله أمام المحكمة استعراض القوة أو التلويح بالعنف من المتهم، وحجزت محكمة جنايات القاهرة المنعقدة في زينهم المحاكمة لجلسة 19 مايو مع استمرار حبس المتهم.
وجاءت اعترافات «وليد. ع»، المتهم تفصيليا أمام جهات التحقيق علي النحو التالي:

س: ما قولك فيما هو منسوب إليك بكونك متهما باستعراض القوة على المجني عليه فرد الأمن بقصد ترويعه وتخويفه لفرض سطوتك عليه مما نتج عنه إلقاء الرعب في نفس المجني عليه وتكدير أمنه وسكينته على النحو المبين بالتحقيقات؟

ج/ الكلام ده محصلش.

س/ ما قولك فيها هو منسوب إليك بالتعدي عمدا على المجني عليه محمد مصطفى فأحدثت به الإصابات الموصوفة بالتقرير الطبي التي أعجزته عن أشغاله الشخصية مدة لا تزيد عن عشرين يوما على النحو المبين بالتحقيقات؟

ج/ أيوة أنا ضربته عشان شتمني بأمي.

المتهم: لم أسب فرد الأمن بألفاظ نابية
س/ ما قولك فيها هو منسوب إليك بسب المجني عليه بأن وجهت إليه الألفاظ المبينة بالتحقيقات التي من شأنها أن تخدش الشرف والاعتبار علانية على النحو المبين بالتحقيقات؟.

ج/ الكلام ده محصلش.

س/ ما الذي حدث إذن؟ وما هي ظروف ضبطك وإحضارك وعرضك علينا؟

ج/ اللي حصل إن أنا كنت مكلف السواق بتاعي يجيب لي ميكانيكي عشان يبص على العربية بتاعتي اللي عطلانة تحت البيت، فاتصل بيا من على البوابة عشان أبلغ فرد الأمن إنه يدخله الكمباوند، فرد الأمن كلمني فقلت له إني أنا عمارة 38 شقة 4، فسأل تاني على رقم الشقة فقلت شقة 4 يا ابني، فهو سمعها يلا بدل يا ابني، فدخل الميكانيكي والمساعد بتاعه والسواق الكومابوند وصلحوا العربية اللي عطلانة وبعدها لقيت الميكانيكي بيقولي إنه بعد ما أنا بلغت فرد الأمن برقم العمارة والشقة، قام رامي التليفون على الترابيزة اللي قدامه، وقال إيه التناكة اللي هو فيها دي، وقام شاتمني بلفظ خادش، فأنا لما عرفت اتعصبت بعد لما اتأكدت منهم كلهم وروحت له وضربته عشان شتم أمي وجابوني على هنا.

س/ متى وأين حدث ذلك؟

ج/ الكلام ده حصل يوم الخميس 2022/4/28 حوالي الساعة 9:40 تقريبا لما رحت لفرد الأمن اللي عند البوابة بكمباوند البارون سيتي بالمقطم.

س/ من كان برفقتك آنذاك؟

ج/ كان معايا الميكانيكي والمساعد بتاعه والسواق بتاعي بس محدش فيهم تعامل معاه نهائي وملهمش دور في الواقعة.

س/ من القائم بضبطك تحديدا؟

ج/ رئيس المباحث هو اللي جالي البيت وبلغني بالواقعة.

أول مرة أتعامل مع فرد الأمن
س/ هل يوجد سابق معرفه بينك وبين المجني عليه؟

ج/ لا هو مجرد فرد أمن وأول مرة أتعامل معاه أصلا، لأني مش باجي من ناحية البوابة دي خالص.

س/ ما قولك فيما جاء بأقوال المجني عليه بتحقيقات النيابة العامة؟

ج/ أنا ضربته فعلا عشان هو شتم أمي الله يرحمها المتوفاة بين إيديا، وهو ده اللي عصبني، لكن الميكانيكي والمساعد بتاعه والسواق مكانش ليهم دعوة بالموضوع ومحدش فيهم جه ناحيته.

س/ ما تعليلك لما قرره سالف الذكر إذن من قيامك وسالفي الذكر بترويعه واستعراض القوة عليه؟

ج/ الكلام ده محصلش، هم ملهمش دور خالص في الواقعة، غير إنهم قالوا لي على اللفظ اللي فرد الأمن ده تلفظ بيه على أمي.

س/ ما قولك فيها جاء بأقوال شهود الواقعة بتحقيقات النيابة العامة؟

ج/ أيوة أنا ضربته عشان هو شتم أمي الله يرحمها، وهي حجت بيت ربنا 3 مرات، وهو ده أكثر حاجة ضايقتني.

تعليقات القراء