رفضوا دخول حالة حرجة في حجرة قريبتهم.. أهالي مريضة يعتدون على طبيب بعزل السنطة (صورة)
كتب: ضياء السقا
اعتدى أهالي مريضة بمستشفى السنطة العام في محافظة الغربية، على الدكتور نشأت رفعت، طبيب العظام داخل قسم العزل، بسبب رفضهم دخول مريضة أخرى بنفس الحجرة المتواجدة بها قريبتهم.
واشتبك أهالي المريضة بالأيدي مع الطبيب، بعد اقتحامهم قسم العزل بالمستشفى، وأصيب بكسر في يديه.
وروى الطبيب أحمد عاطف تفاصيل الواقعة، قائلا: "اللى فى الصورة ده دكتور نشأت ... دكتور عظام زميلنا فى مستشفى السنطة .. كان عنده نبطشية عزل كورونا ... وكانت فيه حالة تعبانة عندها نقص أكسجين فعملها دخول فى المستشفى عشان تتحجز ...فـ مين بقى اللى يرفض إن الحالة تدخل ... مدير العزل ؟ لأ ... مدير المستشفى .. لأ ... وكيل الوزارة ... لأ بردو ".
وتابع عبر حسابه بالفيس بوك: "تخيلو مين رفض إن الحالة تتحجز؟ .... قرايب مريضة تانية هما اللى يرفضوا إن الحالة تتحجز مع قريبتهم فى العنبر بالرغم إن مكنش فيه أماكن سراير إلا ده ... يعنى بالنسبالهم طظ فى أى مريض تانى ويموت المهم محدش يقعد معاها فى الاوضة !! هل الكارثة بتقف لحد هنا ؟ ... لأ خالص ...الدكتور نشأت زميلنا طلعلهم وقالهم مينفعش إحنا مستشفى حكومى ومش من حق حد إنه يستحوذ على المكان بمزاجه ده مش أوتيل يعنى ... و أصر إن الحالة اللى عندها نقص أكسجين وبتموت لازم تدخل غصب عنهم".
وواصل: "فى اللحظة دى بقى 5 من قرايب المريضة اللى رافضين الحالة اللى بتموت تقعد معاها بيقرروا يتهجموا على قسم العزل بالكامل و بيكسروا مستلزمات العزل و بيضربوا التمريض والاتنين أمن الغلابة ( اللى المفروض انهم يمنعوا المرافقين اصلا انهم يدخلوا مبنى العزل من أساسه ) و بيمسكوا الدكتور زميلنا بيتجمعوا عليه يكتفوه ويضربوه ويكسروله ايديه الاتنين زى ما أنتو شايفين .. ده غير العض والخربشة والشتايم".
وأكمل: "مدير المستشفى مشكورا قدر يعمل محضر التعدى بإسم المستشفى ... بس مستنيين نتيجة التحقيق .. أتمنى النقابة ووزارة الصحة متفرطش فى حقنا كدكاترة وفى حق مرضى العزل اللى ملهومش ذنب إن فيه ناس غير آدمية قررت تتهجم على المكان".
وبحسب "اليوم السابع"، تلقى اللواء هاني مدحت مدير أمن الغربية إخطارا من مأمور قسم شرطة السنطة، بتعدي أهل مريض على طبيب العظام المتواجد في قسم العزل.
وتبين من خلال التحريات أن الطبيب تعرض للاعتداء عليه بالضرب المبرح من قبل المرافقين لأحد المرضى الموجودين بقسم العزل داخل المستشفى، حيث قام أهل المريضة بضرب الطبيب بشدة مما أدي الي اصابته بكسور في يديه الاثنتين، وذلك بسبب محاولة الطبيب إقناع أهل المريضة بوضع مريضة أخرى وعزلها برفقة قريبتهم وهو الأمر الذي رفضه أهل المريضة بشدة وتعنتوا معه وحينما اعترض الطبيب على موقفهم تعدوا عليه بالضرب والسباب.
وتم تحرير محضر رقم المحضر 7370 لسنة 2021 جنح مركز شرطة السنطة، حيال تلك الواقعة وجارى اتخاذ الإجراءات القانونية.