بالفيديو.. متعب: "مكسوف من نفسي علشان طلعت من المجزرة سليم"
أبدى عماد متعب مهاجم الأهلي حزنه الشديد من الشائعات التي طاردته خلال الأيام الماضية، رافضا أي مزايدات على لاعبي الفريق الأحمر.
وأضاف متعب في تصريحات تليفزيونية: "في أوقات كتيرة لما بشوف فيها نفسي في المرايا ببقى مكسوف علشان خرجت من مجزرة بورسعيد سليم، بجد أنا متضايق لأني جريت والناس دي ماتت".
وأوضح مهاجم الأهلي: "كنت فاكر إن الناس لما تشوف اللي حصل هاتتغير وتعرف إن في حساب يوم القيامة لكن واضح إننا مش هانتغير.. ومش عارف الناس اللي بتفبرك الأخبار بتنام إزاي لما تروح البيت".
ورفض متعب أن يزايد أي شخص على مشاعره وإحساسه، مؤكدا: "المواقف دي ماينفعش فيها تمثيل لأن ده إحساس.. ومن أول ما الموضوع حصل أخويا كان متابع مع أهالي الشهداء بالزقازيق وكنت قايل للناس قبل ما أسافر إن أعصابي تعبانة مش قادر أقابل حد".
وتابع: "أنا واحد من الناس ماعنديش مقدرة أعمل اللي بيعمله أبو تريكة مع أهالي الشهداء علشان مش هاقدر استحمل المواقف دي".
وواصل: "انتقدوني في الكورة زي مانتوا عايزين بس خلوا عندكوا ضمير ورحمة واحترام للمشاعر".
جدير بالذكر أن متعب تعرض لحملة شرسة من بعض وسائل الإعلام عقب اندلاع أحداث بورسعيد، حيث وجهت إليه اتهامات بعدم حزنه على الشهداء واستشهد البعض بسفره خارج البلاد بعد المجزرة.