"العباسية كلها علي الفيس بوك": يا حينا العريق العظيم سنمحي عنك العار و تعود العباسية في صف الثوار

2011-12-24 23:14

صفحة "العباسية كلها على الفيس بوك" التي دعت إلى مسيرة "العباسية مش تكية" ترد على المشككين في أن المسيرة كمين للثوار بـ احنا أصلا ثوار.

وكتب أدمن الصفحة الآتي:

بعد ما قريت اللي اقدر عليه من مشاركات الناس الكتيره أحب أوضح كام نقطه كده و ياريت تقروا الكلام كويس ...

- البيدج دى معموله من أكتر من سنة و ارائها معروفه من زمان و اللى بيشكك يقدر بمنتهى السهوله يرجع لبوستاتنا القديمه و يعرف بنفسه .

- احنا لا ننتمى لاى حزب او اى كيان سياسي و برضه تقدر ترجع لبوستاتنا القديمه و تتأكد بنفسك .

- لمن لا يفهم كلمه " مسيره " .. دى لا فتنه ولا محاوله الايقاع بين اهالى العباسيه ولا كل الكلام الكبير ده احنا نازلين هنقول راينا كل واحد ماسك فى ايده يافطه مش اكتر و مش هنحتك باى طرف تالى ولا تالت :)

- اللى إدانا الحق نتكلم باسم العباسيه اننا من اهلها و زهقنا من تعميم فكره ان العباسيه تابعه للمخلوع .. و هو نفس اللى اداهم الحق برضه يتكلمو باسم العباسيه .

- بالنسبه لاسم الصفحه اللى بتقولوا هيعمل فتنه .. اسم الصفحه كده من يوم ما اتعلمت و برضه تقدر تراجع من زمان .

- اللى بيقول ده كمين للثوار .. احب أأكد اننا اصلا ثوار :)

يوم الاثنين الساعة 4 العصر بإذن الله

مسيرة سلمية لأهالي العباسية داخل شوارع العباسية لتوصيل رسالة .. نتبرأ أمام العالم كله من من تهمة خيانة الثورة

كلنا هاننزل مع جيرانا و أصحابنا و اخواتنا و كل اللى ييجي يكتب اللى عاوز يقوله فى يافطة و يمسكها كلنا هنعبر عن نفسنا و عن رفضنا للى بيحصل كتروووو من اليفط مش عاوزين حد يتعرض لنا ، عشان كدا تعبيرنا الأكبر هيكون بالكتابة اكتر من الهتافات صوتنا هيوصل لكل وسائل الإعلام و كل مصر.. سلميه سلميه.