"إنسانية طبيب بيطري".. ينقذ حصان من الموت بعدما أغمي عليه بالغربية

 

انتشر على السوشيال ميديا صور لـ طبيب بيطري، يداوي حصان فى الشارع وسط حديث الموجودين عن شهامة الطبيب اللى أنقذ الحصان من الموت فى محافظة الغربية.. طيب إيه اللى حصل؟..

أثناء عودة الدكتور "أمير أحمد يوسف" من عيادته البيطرية الخاصة فى طنطا قبل بداية مواعيد الحظر، وأثناء وجوده فى الشارع فوجيء  بحصان بيجر عربية كارو يسقط على الأرض وبيغمي عليه!.

بدون تفكير أسرع الطبيب البيطري، وطلب من الموجودين السماح له بالكشف على الحصان ويحاولوا يساعدوه إنه ينقله على الرصيف، وعلق له محاليل فى الشارع، وإداله مقوميات وفيتامينات وأدوية مجانية تماماً على حسابه وفضل واقف جنبه لحد ما وقف على رجليه من تاني، ونصح صاحبه إنه يريحه كام يوم وإنه هيرجع تاني عشان يطمن عليه!..

وعلق الدكتور "أمير" :"إنه اختار مهنة الطبيب البيطري لإنها مهنة سامية وبتديله الفرصة يتعامل مع مخلوقات مش بتقدر تعبر عن ألمها ولا اللى حاسة بيه، وبيقول إنه دايماً عنده استعداد يقدم أى مساعدة لأى حيوان بصرف النظر عن المقابل المادي لإن مهنته مهنة إنسانية فى المقام الأول".

 

تعليقات القراء