أشرف فواز يكتب: قمع الرئيس

 

ينفع كده يا شعب؟؟!!

 

بما إن السيسي له قرايب مهمين،،،

 

يقوموا يتسببوا في أن البوب يغير موقفه ويتخلي عن حلمه في حكم المحروسة بعد أن كنا نحلم به يوميا..

 

ينفع كده يا ريس؟ ينفع تضطهد باسم يوسف حتى يهرب لأمريكا مع إنه كان محترم ولا هو حرامي مقالات ولا بيثير الشعب ضد قياداته..

 

وبرضه كنت السبب يا سيسي إن عبد الرحيم علي "اللي عمره ما فضح حد ولا جاب سيرة حد أبدا أبدا" يترك قناة القاهرة والناس وظباط المخابرات ياخدوا منه الصندوق الأسود اللي كان دافع فيه دم قلبه..

 

ومرورا بالإبراشي ومحمود سعد وتدخلك لترفض السينمات عرض فيلم الفنان عمرو لامؤاخذه واكد مع إن الفيلم لما نزل حقق فشل ذريع..

 

وخليني ساكت يا ريس على الآلاف اللي اضطهدتهم بدءا من شجرة الدر اللي خليت المخابرات تضغط على الفنانة نعيمة وصفي لتقتلها بالقبقاب عقابا لها علي قتلها القائد عماد حمدي “أيبك”، مرورا بتسببك في إيقاع الفتنة بين الزعيم ناصر وصديقه عبد الحكيم عامر وحدوث نكسة يونيو ٦٧، ولن نغفل أنك ظلمت الطاهر إبن الطاهرين الشيخ ونيس السلفي وألبستموه قضية فعل فاضح في سيارة مع أنه كان عاريا مع فتاة عارية لأن الجو كان حارا جدا ولم تلتمسوا لهم العذر، ووصولا إن الشعب يصوت للأصوات الباطلة أكثر من تصويته للمرشح الرئاسي المنافس..

 

كل ده ولا يفرق معايا يا ريس، ولا مع شعب مصر، لكن القمع بتاعك يا ريس يوصل ان المدام بتاعتي “أم لهب" تشوف مقالاتي ومتعملش شير ولايك على الفيس بوك!!!! أهو ده اللي لا يمكن أقبله ولا الشعب يقبله..

 

ولهذا أنا أدعو شعب مصر والثوار والإخوان والسلفيين وجميع الأطياف الثورية إلى الانضمام للوقفة السلمية "واخدين بالكم يا إخوان من سلمية دي" التي سوف أنظمها بجامعة عين شمس يوم الجمعة الجاية الساعة ٩ص واللي أنا مش هقدر أتواجد بها لأن إنتم عارفين الواحد بيصحي جسمه متكسر يوم الجمعة..

 

 وبانبه عليك يا سيسي أهو،،،

 

  احنا هيكون معانا الإخوان السلميين في مظاهرة سلمية وياريت الشرطة ما تتأخرش علشان تلحق السلمية من أولها، ولما نشوف السلمية ستنتصر أو الغلبة للقمعية، ولو عملتوا معانا القمعية إعمل حسابي أنا هاقبض الأول.