علاء الدين العبد يكتب: حاول تتمشى على رجليك

صحيح ممكن جداً يكون منظر الباعة الجائلين مش حضاري وبيشوِّه صورة البلد، لكن على الأقل بيشتغلوا شغلانة حلال ياكلوا منها عيش، فياريت قبل ما نقاومهم لازم نوفر لهم البديل من فرص العمل، وده أقل حق من حقوقهم التي كفلها لهم الدستور الجديد، وكفاية جداً إنهم كافيين خيرهم شرهم، لا بيعملوا إضراب ولا لهم مطالب فئوية،  وأكيد هتوافقوني أن استمرار الرشوة و انتشار البلطجة وعدم المساس بسيمفونية الفساد حتى الآن ، أهم وأولى أن نركز فيها شوية ، ويبقى عندنا دم و قليل من الشجاعة و إلا فأنتم عارفين إيه اللي ممكن يحصل .. 

 

حذاري من الغلابة فهناك من يُقدِّرهم جيداً ويعرف قيمتهم ويعرف يستفيد منهم جيداً ..

 

بمناسبة الكلام على الغلابة ، حاول حضرتك تركن عربيتك في أي مكان آمن وتتمشى شوية على رجليك و تدخل الأحياء الشعبية أوالشوارع الجانبية  و الحاراتالضيقة  في مناطق قديمة واشتري طلباتك من البقالات الصغيرة وبلاش السوبرماركت والهايبر والمول ، وركز شوية في الناس اللى واقفة جنبك شكلها إيه ، لابسه إيه ، صحتها عاملة إيه ، و لاحظ حضرتك الناس دي  بتشتري إيه ، و كمياتها إيه ، و كرر التجربة في مواعيد مختلفة ، يعني مرة الظهر ومرة بعد المغرب ومرة في آخر السهرة ، طبعاً ما أقدرش أقولك روح الصبح بدري وشوف الناس وهما بيشتروا الفطار ، لأن حضرتك إما هتكون نايم ، أو بتنتظر فطارك يجهز ، طبعاً بعتذر لجنابك على ريحة الصرف الصحي اللى زكمتك ، و مياه المجاري اللى طرطشت عليك وإنت ماشي ، وأكيد باعتذر لسعادتك على مناظر البؤس اللي شفتها واحتمال تقلق منامك ، يمكن بعدها كده تفكَّر كويس جداً قبل ما تقرَّب من الناس دي وهتعرف إننا متحاملين عليهم كتير ، وكتير مننا هَيِتْحَمِّل ذنبهم ..

 

على فكرة الناس دي بتدفع ضرائب على دخلها بالظبط زيها زيك ، ومبيعرفوش يتهربوا منها ، يعني حقوقها لازم تكون زيك بالظبط ، لكنهم طيبين شوية وراضيين جداً وشرفاء جداً جداً ، وإيديهم أطهر وأعف من كتير جنابك تعرفهم ، عايزين بس الستر والأمن ، الناس دي أصل مصر .