د. أحمد أمين يجيب: ابني بيلعب رياضة وبيروح تمرين .. المفروض نظام أكله يبقى عامل إزاي ؟
إعداد: جهاد محمود صالح
ابني بيلعب رياضة و بيروح تمرين .. المفروض نظام أكله يبقى عامل ازاي ؟؟
شوفي يا ستي.. الطفل اللي بيمارس رياضة لازم يكون نظام اكله مختلف عن العادي عشان يقدر يستفيد الاستفادة الأمثل من الرياضة اللي بيمارسها و متسببلوش اجهاد او تؤثر على نموه الطبيعي .
لو ابنك بيروح تمرين بانتظام اتبعي النظام و النصايح اللي جاية :
في يوم التمرين الوجبة اللي قبل التمرين لازم تكون قبليه ب ٣ ساعات على الاقل .. عشان ندي فرصة للمعدة عشان تفضي الاكل اللي فيها
الوجبة دي لازم تتكون من الآتي: كمية كربوهيدرات كتيرة عشان تمده بالطاقة و بروتين .. مينفعش ألياف و دهون عشان بتاخد وقت طويل في الهضم و الامتصاص و ممكن تسبب اجهاد للطفل و تؤثر على مجهوده
لو الظروف متسمحش الوجبة تبقى قبل التمرين ب ٣ ساعات .. لو ضروري ياكل .. يبقى هياكل حاجة سريعة الامتصاص زي السكريات البسيطة ((الفواكة-العصاير)) و ممكن العيش
بعد التمرين بنص ساعة لازم الطفل ياخد snack من السكريات .. فاكهة او عصير عشان يعوض مخزون الطاقة المستهلكة.
بعد التمرين بساعة لازم ياخد الوجبة الرئيسية اللي لازم تكون غنية جدا بالبروتين و فيها كمية معقولة من الدهون عشان يقدر يبني عضلاته و يستفيد من تمرينه.
في اثناء التمرين لازم تتأكدي ان ابنك او بنتك بياخد كميات كفاية من السوائل .. لازم توجهيه انه يشرب كل ١٥ ل ٢٠ دقيقة اثناء التمرين .. ((طبعا موضوع ان الطفل مينفعش يشرب وهو بيتمرن عشان ده بيتعب القلب والرئة ده كله كلام فارغ و حواديت جدات))
طيب نوع السوائل اللي يشربها ايه ؟!! شوفي .. متغلبيش
نفسك .. المية كفاية .. متروحيش تشتري سوائل الرياضيين و الكلام اللي بالشيء الفلاني ده .. مدام طفلك مش بيتمرن تمرين عنيف اكتر من ساعتين في رياضة عنيفة يبقى مية كفاية و من الحنفية كمان !
طيب لو طفلي مش بيحب يشرب مية او بيتمرن تمرين عنيف ؟ العصاير المخففة في الحالة دي بديل ممتاز جدا و كافي .. برضو متشتريش سوائل رياض
فيتامين دال vitamin D ضروري جدا لاي حد بيلعب رياضة .. بيحافظ على عظم الطفل و بيقويه و بيقلل كتير جدا من احتمالية اصابات الملاعب .. ادي ابنك ٦٠٠ وحدة يوميا خصوصا لو تمرينه في صالة مغلقة
و اخيرا متنسيش الاكل الغني بالحديد .. احمي طفلك من انيميا نقص الحديد .. الانيميا بتخلي طفلك غير قادر على بذل مجهود و يتعب بسرعة
د. أحمد أمين طبيب متخصص في طب الأطفال يهدف لنشر الوعي الصحي و تثقيف الأمهات والآباء و مساعدتهم على تهيئة أفضل مناخ صحي و نفسي لأطفالهم