رسالة هامة من د. أحمد أمين لكل أب و أم : مش لازم تطلع ابنك طبيب اوليمبي !!
اهالينا زمان كانت بتزعقلنا لما نسيب المذاكرة و نلعب كورة و يقولولنا الكورة في الاجازة بس .. وركزوا في دروسكم.
الاهالي دلوقتي بيجرو بولادهم من المدرسة للتمرين للدرس للتمرين .. وبيستنو تقييم المدرب لابنهم زي ما بيستنو نتيجة امتحان اخر السنة !!
الحقيقة ان ممارسة الرياضة بجانب الدراسة مهمة جدا و مفيش تعارض بينهم .. بس مش معنى كده اني اضغط على ابني او بنتي لحد ما يجيب اخره عشان عايزه يتفوق في الاتنين !! .. في الاخر هيفشل في الاتنين !!
مش لازم تطلع ابنك طبيب اوليمبي !!
ولازم تعرف ان الرياضة في الاول و الاخر موهبة وقدرات ،، مهما تضغط على ابنك مش بايده ،، حرام اللي بتعملوه في ولادكم ده.
متخلهومش يوصلو لمرحلة الانهيار بسببكم زي ما حصل مع ريم مجدي الله يرحمها لو حد فاكرها.
في نماذج بنشوفها والله العظيم تحزن ،، و الواحد لو بايده ياخد ولادهم منهم و ميشوفهمش تاني.
الأم اللي ضربت بنتها بالقلم قصاد الناس كلها عشان خسرت ماتش التنس ،، الأب اللي مدخلش ابنه البيت عشان خسر بطولة السباحة.
رفقا بولادكم ارجوكم،، ،، مطلعوش عقدكم عليهم ،، مش لازم ينجحوا في كل حاجة انتو اساسا فشلتم فيها ،، بلاش حبكم الفشخرة الكدابة يضغط على ولادكم.
علموهم و شجعوهم على لعب الرياضة .. بس في نفس الوقت عاملوهم على ان الرياضة.
هواية مش مهنة !!